«Qazaqstan boks federatsııasynyń kýbogy» jolyndaǵy boks chempıonatynyń kezekti kezeńi Astanada ótýde
ASTANA. Shildeniń 31-i QazAqparat /Jasulan Amanbaıuly/ - Búgin, «Qazaqstan boks federatsııasynyń kýbogy» jolyndaǵy boks chempıonatynda Astana qalasy jáne Pavlodar oblysynyń quramalarynyń jekpe jek saıysy bastaldy, dep habarlaıdy QazAqparat.
Shyǵys dıvızıonyna kiretin 4 komandanyń Astana qalasy jáne Pavlodar oblysynyń bylǵary qolǵap sheberleri 10 salmaq dárejeleri boıynsha sharshy alańǵa shyǵady. Jalpy kýbok jarystaryna oblystyq boks federatsııalarynyń sport klýbtary negizinde qalyptasqan Soltústik, Ońtústik, Batys, Shyǵys bolyp tórt aımaqtyq dıvızıonǵa bólingen 16 komanda qatysady.
Búgin, kezdesý aldyndaǵy baspasóz máslıhatynda Bolat Mankenovtiń aıtýynsha, chempıonattyń negizgi maqsaty - Qazaqstannyń aımaqtaryndaǵy boksty damytý. «Aımaqtyq boks federatsııalarynyń jumystaryn júıeli túrde jolǵa qoıǵan bapkerlerimiz bar, talapty boksshylarymyz bar. Endigi kezekte básekeli ortany qalyptastyrýymyz kerek», dedi Qazaqstannyń bokstan memlekettik bapkeri Bolat Mankenov.
Eki komandanyń da bapkerleri ózderiniń boksshylaryn saqadaı saı dep sendirip otyr. Quramalar chempıonat aldynda eki ret daıyndyq jıyndaryn ótkizgen.
Astana komandasy Pavlodar, Óskemen jáne Taldyqorǵan quramalarymen birge «Shyǵys» dıvızıonyna kirgen.
Bunyń aldynda Batys dıvızıonynyń Aqtaý jáne Aqtóbe, Atyraý jáne Oral qalalarynyń boksshylary ózara jekpe jekke túsken bolatyn. Bul kezdesýlerde Aqtaý jáne Atyraý quramalary jeńiske jetti.
