Qazaqstan boks federatsııasynyń kýbogy jarysy ótetin qalalar men jekpe-jek qarsylastary anyqtaldy

Qazaqstan boks federatsııasynyń kýbogy úshin jarysqa 14 oblys pen Astana jáne Almaty qalalarynyń boksshylary Soltústik, Ońtústik, Batys, Shyǵys bolyp, tórt aımaqtyq dıvızıonǵa bólinip, komandalyq esep boıynsha synǵa túsedi. Top jarǵan komandalar 1/4 fınaldyq jekpe-jekke joldama alady.

 Búgin QR Boks federatsııasy men qurama ókilderiniń qatysýymen ótken jerebe tartý rásimi barysynda Soltústik dıvızıonynda SQO men Aqmola oblystarynyń quramalary Kókshetaýda bir-birimen qolǵap túıistiretin boldy. Al kenshiler qalasynda jergilikti Qaraǵandy oblysynyń boksshylary Qostanaı oblysynyń órenderimen birge kimniń myqty ekendigin anyqtaıdy.

 Ońtústik dıvızıonyndaǵy Almaty qalasynyń quramasy men Qyzylorda oblysy boksshylarynyń kezdesýi Almaty qalasynda ótedi. Jambyl oblysynyń boksshylary kórshiles jatqan OQO-nyń quramasymen Taraz qalasynda synǵa túsedi.

 Batys dıvızıonyndaǵy matchtar Aqtóbe oblysy men Mańǵystaý oblysy, Atyraý oblysy men BQO arasynda, Shyǵys tobynda Astana qalasy men Almaty oblysy quramalarynyń sheberlik synasýy ótetin boldy. Al Pavlodar boksshylary Óskemen qalasynda ShQO-nyń quramasymen kezdesedi.   

 Jarys úılestirýshisi Berik Marjyqbaevtyń jerebe barysynda habarlaǵanyndaı, Kýbok úshin jarystar ústimizdegi jyldyń 15 qazanynda bastalady. Jarys erejeleri AIBA belgilegen olımpıadalyq júıeniń negizinde júrgizilmek. Fınaldyq jekpe-jek dástúr boıynsha Astana qalasynda ótedi.