Qazaqstan Boks federatsııasy kýbogynyń shırek fınaldary ótedi
ASTANA. QazAqparat - Búgin Oral men Qaraǵandy qalalarynda «V» jáne «D» toptarynda Qazaqstan Boks federatsııasy kýbogy shırek fınalynyń alǵashqy kezdesýleri ótedi, dep habarlady federatsııanyń baspasó qyzmetinen.
«Oral qalasynda ótetin «V» tobynda Astana qalasynyń, Jambyl men Batys Qazaqstan oblystarynyń komandalary kezdesedi. Al kelesi topta Qaraǵandy, Almaty, Atyraý jáne Soltústik Qazaqstan oblystarynyń bylǵary qolǵap sheberleri baq synaıdy. Kelesi kezeńge osy topta jeńiske jetken komanda shyǵatyn bolady. Kezdesý 8-10 tamyz kúnderi ótedi», - delingen habarlamada.
Qazaqstan BF kýbogynyń 5-shi mereıtoılyq maýsymynda jeńiske jetken komanda 25 mln. teńge kólemindegi júldege ıe bolady. Jartylaı fınal men aqtyq syn 14-15 jeltoqsan kúnderi elorda tórinde uıymdastyrylady.
Esterińizge sala keteıik, 2010 jáne 2013 jyldary bul kýbogty elorda boksshylary ıelense, 2011 jyly Qaraǵandy oblysynyń, al 2012 jyly Mańǵystaý oblysynyń kúrzi judyryq jigitteri jeńip alǵan bolatyn.
