Qazaqstan boks federatsııasy AIBA-daǵy teketireske qatysty ustanymyn bildirdi
ASTANA. QazAqparat - Búgin Qazaqstan boks federatsııasynyń jyl saıynǵy konferentsııasynda Tımýr Qulybaev AIBA-daǵy teketireske qatysty ustanymyn jetkizdi, dep xabarlaıdy QazAqparat tilshisi.
"AIBA-da prezıdent pen ýaqytsha komıtet arasyndaǵy kelispeýshilik áli de sheshilmeı keledi. Olar onyń quziretin toqtatýdy talap etip otyr. Qazaqstannyń boks federatsııasynyń ustanymy ózgermeıdi. Biz zań men quqyqtyń ústemdigin, AIBA jarlyǵynyń oryndalǵanyn qalaımyz. Sondyqtan qazirgi kelispeýshilikter jaqyn arada sheshiledi dep senemiz. Shyny kerek, qazirgi kezde AIBA jolaıryqta tur. Biz bolsaq, atalǵan uıymnyń zańdy organdarymen jumys isteıtin bolamyz. Sot prezıdenttiń quziretin rastady", - dep atap kórsetti QBF prezıdenti Qulybaev.
Uıym basshysynyń aıtýynsha, Qazaqstanda jas boksshylardy daıarlaý jumysy oıdaǵydaı atqarylyp keledi. Rezerv te bar. Tóreshilerdiń kásibı biliktiligi de joǵary. On tóreshiniń toǵyzynda AIBA-nyń joǵary kategorııasy bar.
Aıta keteıik, búgingi konferentsııada Tımýr Qulybaev boks erejelerine birqatar ózgeristerdiń engizilgenin de jarııalady.
