Qazaqstan bochcha federatsııasy Halyqaralyq federatsııa quramyna endi
ASTANA. QazAqparat – Qazaqstan bochcha federatsııasy resmı túrde Boccia International Sports Federation (BISFed) – Halyqaralyq bochcha federatsııasynyń múshesi boldy, dep habarlaıdy QazAqparat uıymnyń baspasóz qyzmetine silteme jasap.
Halyqaralyq federatsııaǵa múshe bolý qazaqstandyq erekshe sportshylar úshin jańa múmkindikterge jol ashady. Endi otandyq federatsııanyń ókilderi bochcha boıynsha chellendjerler, álem chempıonattary, Paralımpıada oıyndary, Azııa paralımpıada oıyndary sııaqty halyqaralyq jarystarǵa qatysa alady.
Bıyl Qazaqstan bochcha federatsııasy ulttyq quramanyń 8 múshesine úsh halyqaralyq jarysqa, naqty aıtqanda eki halyqaralyq chellendjerge jáne Azııa paralımpıada oıyndaryna qatysýǵa ótinim berýdi josparlap otyr. Azııa Paralımpıadasy 2023 jyldyń qazan aıynda Qytaıda, al Paralımpıada 2024 jyly Parıjde ótedi.
«Bul – ınklıýzıvti sport túrleriniń damýyna múddeli kez kelgen adam úshin úlken jeńis. Osylaısha, múgedektigi bar sportshylarǵa jańa múmkindikter týyp otyr. Bizdiń jarystarymyzǵa kóbine erekshe balalar qatysady. Endi olardyń aldynda jańa maqsattar men mindetter paıda boldy. Sondaı-aq, jas sportshylar úshin bul ortaǵa beıimdelýge, dos tabýǵa jáne jańa tájirıbe alýǵa zor septigin tıgizedi. Halyqaralyq federatsııaǵa múshe bolý bizdiń erekshe sportshylarymyzdyń deńgeıi men eńbeginiń álemdik deńgeıde moıyndalýy ekeni sózsiz», – dedi QR Parlamenti Senatynyń tóraǵasy jáne Qazaqstan bochcha federatsııasynyń prezıdenti Máýlen Áshimbaev.
Aıta keteıik, bıyl maýsym aıynda Qazaqstan bochcha federatsııasy el chempıonatyn ótkizedi. Sonyń nátıjesi boıynsha Qazaqstan quramasy jasaqtalady.
