Qazaqstan bilim berýde Ortalyq jáne Ońtústik Azııada kósh bastady
ASTANA. KAZINFORM — Qazaqstan Ortalyq jáne Ońtústik Azııa elderi arasynda «Bilim berý» kórsetkishi boıynsha birinshi orynǵa ıe boldy.
Memleket basshysy Qasym-Jomart Toqaevtyń bastamasymen Qazaqstanda bilim sapasy men qoljetimdiligin arttyrýǵa, zamanaýı mektep ınfraqurylymyn damytýǵa jáne pedagogterdiń áleýetin nyǵaıtýǵa baǵyttalǵan aýqymdy reformalar júıeli túrde júzege asyrylýda. Bul baǵyttar adamı kapıtaldy damytý jónindegi memlekettik saıasattyń mańyzdy bóligi bolyp sanalady.
2025 jylǵy Jahandyq ınnovatsııalar ındeksiniń (Global Innovation Index) nátıjesi boıynsha Qazaqstan Ortalyq jáne Ońtústik Azııa elderi arasynda «Bilim berý» kórsetkishi boıynsha birinshi orynǵa ıe boldy. Álemdik reıtıngte elimiz 68-orynǵa shyqty.
Halyqaralyq menedjmentti damytý ınstıtýtynyń (IMD) Álemdik básekege qabilettilik reıtınginde de oń dınamıka baıqaldy. «Bilim berý» kórsetkishi boıynsha Qazaqstan 69 eldiń arasynda 2021 jylǵy 45-orynnan 2025 jyly 38-orynǵa kóterilip, sońǵy bes jyldaǵy eń joǵary nátıjege qol jetkizdi.
Taǵy bir mańyzdy jetistik - Qazaqstannyń orta bilim berý júıesindegi oqýshylar men pedagogter sanynyń araqatynasy boıynsha 69 eldiń arasynda ekinshi oryn alýy. IMD-nyń Álemdik talanttar reıtınginiń málimetine sáıkes, elimizde bir pedagogke 8,34 oqýshydan keledi.
Memlekettik saıasat aıasynda bilim berý ınfraqurylymyn damytý jumystary jalǵasýda. Memleket basshysynyń bastamasymen júzege asyrylǵan «Keleshek mektepteri» ulttyq jobasy aıasynda 460 myń oqýshy ornyna arnalǵan 217 zamanaýı mektep salyndy. Sonymen qatar pedagogterdi qoldaý sharalary jetildirilip, bilim sapasyn arttyrýǵa qajetti jaǵdaılar jasalýda.
Halyqaralyq reıtıngterdiń kórsetkishteri Qazaqstannyń bilim berý salasyndaǵy ornyn aıqyndap, adamı kapıtaldy nyǵaıtýdaǵy bilim berý júıesin júıeli damytýdyń mańyzyn kórsetedi.
Aıta ketelik qazaqstandyq jas robototehnıkter álemniń úzdik tórttigine engen edi.
