Qazaqstan bilim berý salasynda aıtarlyqtaı alǵa jyljydy - Estonııa Prezıdenti
ASTANA. KAZINFORM — 17 qarashada Estonııa Respýblıkasynyń prezıdenti, professor Alar Karıs Qazaqstanǵa memlekettik sapary aıasynda Nazarbayev University-ge (NU) bardy.
Oqý orny Times Higher Education reıtınginiń nusqasy boıynsha Ortalyq Azııa men Kavkazdyń jetekshi ýnıversıteti retinde moıyndalǵan. Prezıdenttik delegatsııa quramynda Estonııanyń Qazaqstandaǵy elshisi ıAap Ora, bilim jáne ǵylym vıtse-mınıstri Renno Veıntal, prezıdenttiń keńesshileri jáne jetekshi estonııalyq ýnıversıtetterdiń rektorlary boldy. Qonaqtardy QR Ǵylym jáne joǵary bilim mınıstri Saıasat Nurbek pen NU prezıdenti Vakar Ahmad qarsy aldy.
Alar Karıs «Connectivity, Common Interests, and Cooperation» («Baılanys, Ortaq Múddeler jáne Yntymaqtastyq») taqyrybynda dáris oqydy. Sharaǵa 200-den astam adam qatysty, onyń ishinde memlekettik saıasat, bilim, jasandy ıntellekt jáne basqa da salalar boıynsha bakalavrıat, magıstratýra jáne doktorantýra stýdentteri boldy.
NU prezıdenti Vakar Ahmad Estonııa prezıdentine ýnıversıtetti tanystyra otyryp: «University of Tartu-dyń uzaq jáne dańqty tarıhymen salystyrǵanda, biz áli jas ýnıversıtetpiz. NU jas bolǵanyna qaramastan, álemdik deńgeıdegi ýnıversıtet bolýǵa, elge jáne óńirge qyzmet etýge, sondaı-aq jahandyq máselelerdi sheshýge qosqan úles qosýda», — dedi.
Estonııa Prezıdenti óz sózinde bilim men ǵylymnyń memlekettiń bolashaǵy úshin mańyzdylyǵyn atap ótti, Estonııa men Qazaqstannyń tarıhı jáne mádenı baılanystaryna toqtaldy, sondaı-aq halyqaralyq qatynastarda senim men naqty erejelerdiń rólin erekshe atap kórsetti.
«Men Qazaqstanda bolyp, alǵashqy sózimdi dál osy jerde, NU stýdentteri aldynda, jetkizip otyrǵanyma qýanyshtymyn. Estonııanyń eki ýnıversıtetiniń burynǵy rektory retinde men bilim men onyń halyqqa paıdasy týraly jaqsy túsinemin. Geografııalyq turǵydan biz bir-birimizden alys bolsaq ta, qazaqtar men estondardyń kóp ortaq qasıeti bar. Bizdiń tikeleı jáne janama baılanysatyn baı ortaq tarıhymyz bar. Eki el de ejelgi saýda joldarynda boldy, kóp nárseni bastan ótkerdik jáne kóp nársege úırendik, endi qazir bilimimizben bólisýdemiz», — dedi professor Alar Karıs.
Dáristiń bir bóligin prezıdent jasandy ıntellekt máselelerine, ásirese onyń bilim berý salasyndaǵy róline, nazar aýdardy. Ol tehnologııalardy saýatty paıdalaný jáne jastardy tsıfrlyq bolashaqqa daıyndaýdyń mańyzdylyǵyn atap ótti.
«Búgin biz jańa zaman dúnıesi — jasandy ıntellektpen tanysyp otyrmyz. Ony ıgerýdiń eń tıimdi joly — bilimnen bastaý: balalardy sanaly paıdalanýshylar bolýǵa baýlý, olarǵa JI-dyń artyqshylyqtary men qaýipteri týraly aıtý. Estonııada biz AI League atty jalpyulttyq baǵdarlamany iske qostyq, ol muǵalimder men oqýshylarǵa arnaıy beıimdelgen JI platformalaryn biriktiredi. Qazaqstan bilim berý salasynda elektrondyq quraldar men qosymshalardy qoldanýda aıtarlyqtaı alǵa jyljyǵanyn jaqsy bilemin. Osy oraıda eki eldiń bolashaqta yntymaqtastyq úshin kóptegen uqsastyq pen múmkindik baryna senemin», — dep atap ótti prezıdent.
Odan keıin Estonııa prezıdenti NU-dyń Qonaqtar kitabyna jazba qaldyrdy jáne kampýsqa ekskýrsııa jasap, onyń ishinde KazLLM atty alǵashqy qazaqsha tildik modeldi jasaǵan Aqyldy júıeler jáne jasandy ıntellekt ınstıtýtynyń JI salasyndaǵy ázirlemelerimen tanysty.
Eýropalyq prezıdenttiń ýnıversıtetke sapary Qazaqstan men Estonııa rektorlary forýmynyń ashylýymen aıaqtaldy. Bul forýmda eki eldiń joǵary bilim jáne ǵylym vıtse-mınıstrleri men oqý orny rektorlary atalǵan saladaǵy yntymaqtastyq perspektıvalaryn talqylamaq.
Aıta keteıik, Qazaqstan men Estonııa prezıdentteri kelissóz júrgizdi.