Qazaqstan BQO-ǵa Reseı kanalynan sý alǵany úshin 5 mlrd teńge tólep otyr

ASTANA. KAZINFORM — Sý resýrstary jáne ırrıgatsııa mınıstri Nurjan Nurjigitov Májilistegi Úkimet saǵatynan keıin ótken baspasóz máslıhatynda Saratov kanalynan sý alý Qazaqstan bıýdjetine qandaı salmaq salǵanyn aıtty.

— Batys Qazaqstan oblysynyń Qaztalov, Janǵaly aýdandaryna Reseıdiń Saratov kanalynan sý alyp, ol úshin aqy tólep otyr. Al siz jańa Reseıge sý úshin eshqandaı aqsha tólemeıtinimizdi aıttyńyz? Solaı bolsa, bul aýdandarǵa Reseı sýdy tegin berip otyr ma, — dep surady jýrnalıst.

Mınıstr atalǵan aýdandarǵa Reseıden sý alǵany úshin bıýdjet qarajaty jumsalatynyn rastady. Biraq ol aqsha sýdyń ózine emes, tasymal shyǵyndaryna tólenetinin naqtylady.

— Bul jerde Reseıge sýdyń aqysyna aqsha tólep otyrǵan joqpyz. Kanaldan sýdy aıdap jetkizý úshin elektr qýaty jumsalady. Sol jumsalǵan toqtyń qunyn tóleımiz. Onyń kólemi jylyna 5 mlrd teńge, — dedi mınıstr.

Aıta ketý kerek, Kaspıı máselesin sheshý aıasynda Qazaqstan Reseıge Edil sýyn birlesip retteý týraly usynys jasamaqshy.