Qazaqstan bıznesine Aýǵanstanda qandaı múmkindikter bar
ASTANA. QazAqparat - QR Syrtqy ister mınıstriniń orynbasary Erjan Ashyqbaev qazaqstandyq-aýǵanstandyq ekonomıkalyq yntymaqtastyqtyń perspektıvalary týraly aıtyp berdi, dep habarlaıdy QazAqparat tilshisi.
«Búgin Úkimet saǵatynda mınıstr qazaqstandyq kompanııa tender utyp alǵanyn habarlaǵan bolatyn. Bul memlekettik tenderdi qarjylandyrý Aýǵanstan úkimeti tarapynan iske asyrylady, sebebi ol joba bul el úshin basymdyqty bolyp otyr. Bolashaqta barlyq talaptardy saqtaı otyryp, qazaqstandyq kompanııalar ınvestor retinde kirýi múmkindigin joqqa shyǵarmaımyz», - dedi E.Ashyqbaev Parlament Májilisinde tilshiler saýalyna jaýap bere otyryp.
Osy oraıda ol atalǵan eldegi ózindik ahýaldy eske ala otyryp, qazaqstandyq bıznesmender úshin qaýipsizdikke tolyqtaı kepildik berý qıyn ekenin atap ótti.
«Árıne, qaýipsizdik máselesi basymdyqty baǵyttardyń biri bolyp otyr. Biz jaǵdaıdy tyńǵylyqty zerdelep, qazaqstandyq kompanııalarǵa usynystar beremiz. Barynsha qolaıly jumys rejimin qamtamasyz etýge tyrysamyz. Ózderińiz túsinesizder, qaýipsizdik boıynsha 100 paıyzǵa kepildik berý múmkin emes. Aýǵanstan problemasy boıynsha uzaqmerzimdi sheshim jasalǵanda ǵana kepildik berýge bolady», - dedi mınıstrdiń orynbasary.
Budan buryn habarlanǵandaı, Qazaqstan Aýǵanstandaǵy temirjol qurylysyna úlesin qosady.
Sonymen qatar, elimiz atalǵan memleket aýmaǵynda ken oryndaryn ıgerýdi kózdep otyr.
