Qazaqstan bıznes júrgizý qolaıly TOP-20 eldiń qataryna kirýi tıis
NUR-SULTAN. QazAqparat – Qazaqstan álemdegi bıznes júrgizýde barynsha qolaıly jaǵdaıy bar TOP-20 eldiń qataryna kirýi tıis. Bul týraly Májilistegi «Nur Otan» partııasy parlamenttik fraktsııasynyń keńeıtilgen otyrysynda Úkimet basshysy Asqar Mamın aıtty, dep habarlaıdy QazAqparat tilshisi.
«Myqty kásipkerlik sanatty qalyptastyrý jónindegi jańa ádisterdi júzege asyrý nátıjesinde 2025 jylǵa qaraı shaǵyn jáne orta bızneste jumyspen qamtylǵandar sany 4 mln adamǵa jetkiziledi. Jyldyq ósim 100 myń adamdy quraıdy. Bıyl shaǵyn jáne orta bızneste jumyspen qamtylǵandardyń sany 3,6 mln adamǵa jetedi. Bul rette bıyl JІÓ-degi ShOB úlesi 30,5 paıyzǵa artyp, 2025 jylǵa qaraı atalǵan kórsetkishtiń máni 35 paıyzdy quraıtyn bolady», - dedi Úkimet basshysy «Nur Otan» partııasynyń «Ózgerister joly: ár azamatqa laıyqty ómir!» Saılaý baǵdarlamasyn oryndaýdyń Jol kartasyn talqylaý barysynda.
Onyń aıtýynsha, ekonomıkany odan ary ındýstrııalandyrý aıasyynda óńdeý ónerkásibiniń óndiris kólemi 1,5 ese artady. 2021 jyly ósim 10,8 paıyzdy qurap, 2025 jylǵa deıin jyl saıynǵy ósimmen 51 paıyzǵa deıin jetkiziledi.
«Іskerlik ortany jetildirý jónindegi júıeli sharalardyń nátıjesinde Qazaqstan álemdegi bıznes júrgizýde barynsha qolaıly jaǵdaıy bar TOP-20 eldiń qataryna kirýi tıis. 2025 jylǵa deıin jeke bıznes ashý úshin 50 myń azamatqa, onyń ishinde 42 myń aýyl turǵynyna jalpy somasy 250 mlrd teńge bolatyn shaǵyn kredıt beriledi. Bıyl shaǵyn nesıe 8 myń azamatqa berilip, 2025 jylǵa qaraı 12 myń adamǵa deıin keńeıtiledi. Shıkizattyq emes eksport kólemi 2 ese, 41 mlrd dollarǵa deıin artady. 2021 jyly atalǵan kórsetkishtiń máni 29 mlrd dollardan asyp túsedi», - dedi Premer-Mınıstr.
