Qazaqstan bizge jeruıyq meken bolǵany úshin iltıpat bildiremin - Atyraýdaǵy evreı etnomádenı birlestiginiń jetekshisi P.Tkach
ASTANA. QazAqparat - Atyraýdaǵy «Alııa» evreı etnomádenı birlestiginiń jetekshisi Pavel Tkach Elbasy Nursultan Nazarbaevqa hat joldady.
Bul týraly Aqordanyń baspasóz qyzmeti habarlady.
Avtor óz hatynda shet elderge turaqty turýǵa ketken jaqyndarynyń kúrdeli jaǵdaılary týraly aıtqan. P.Tkach solardyń kópshiligi tildik beıimdelýge, áleýmettik teńsizdikke, sondaı-aq qarýly qaqtyǵystarǵa baılanysty túrli qıyndyqqa ushyrap otyrǵanyn atap kórsetken.
Soǵan oraı ol Nursultan Nazarbaevqa elimizde tatýlyq pen kelisim saıasatyn júrgizip otyrǵany úshin rızashylyǵyn bildirgen, sonymen qatar qonaqjaılyǵy men keń peıili úshin Qazaqstan halqyna alǵys aıtqan.
«Qıyn-qystaý jyldary qanshama adamǵa pana boldyńyzdar, qoldaý kórsettińizder. Qazaqstan bizge jeruıyq meken bolǵany úshin jáne bárimiz beıbit aspan astynda ómir súrip jatqanymyz úshin sizderge ózimniń ǵana emes, búkil týǵandarymnyń atynan bas ıip, iltıpat bildiremin. Biz belgilengen barlyq reformalardy júzege asyratynymyzǵa nyq senimdimin. Men buǵan óz tarapymnan bar kúshim men bilimimdi jumsaıtyn bolamyn», - delingen hatta.
