Qazaqstan bıyl Reseı, Ýkraına, Ázerbaıjan men Izraılge 4069 tonna balyq eksporttady
ATYRAÝ. QazAqparat - Atyraýda kóktemgi balyq aýlaý maýsymynda 6,5 myń tonnaǵa jýyq balyq aýlandy, dep habarlaıdy QazAqparat.
Óńirlik kommýnıkatsııalar qyzmetiniń habarlaýynsha, 6 492 tonna balyq aýlanyp, belgilengen lımıt 87 %-ǵa ıgerilgen.
Atyraý oblystyq balyq sharýashylyǵy basqarmasynyń aqparatyna súıensek, bıyl kóktemgi balyq aýlaý maýsymyna Jaıyq-Kaspıı basseıni boıynsha 7434 tonna kvota bólingen. Onyń ishinde Kaspıı teńizinen – 3 190 tonna, Jaıyq ózeninen – 2 223 tonna, Qıǵash ózeninen – 2 021 tonna balyq aýlanýy josparlanǵan. Ótken jylmen salystyrǵanda, kásibı túrde balyq aýlaý kólemi 794 tonnaǵa ósken. Al, byltyr 5 698 tonna bolatyn.
«Bıyl aýlanǵan balyqtyń 5000 tonnasy óńdelip, 4069 tonnasy Reseı Federatsııasy, Ýkraına, Ázerbaıjan jáne Izraıl elderine eksporttaldy. Qazir Atyraý oblysynyń aýmaǵynda túrli menshik nysanyndaǵy 18 óndiristik kásiporyn balyq aýlaý jáne qaıta óńdeýmen aınalysady. Onyń arasynda eki bekire balyǵyn ósirý zaýyty bar. Olar – «Jaıyq-Atyraý» bekire balyq ósirý zaýyty» RMQK, «Atyraý bekire balyq ósirý zaýyty» RMQK» -dedi oblystyq balyq sharýashylyǵy basqarmasynyń basshysy Artýr Sádibekuly.
Sondaı-aq, bıyl memlekettik tapsyrysty oryndaý maqsatynda bekire balyǵyn ósirý zaýyttary úshin 269 dana balyq aýlandy. Ótken jyly bekire tuqymdas 241 balyq aýlanǵan edi. Atalǵan eki zaýyt jyl saıyn Kaspıı teńizine jasandy jolmen ósirilgen 7 mln-nan astam bekire shabaqtaryn jiberedi.
