Qazaqstan bıyl Mysyrǵa 1,5 mln. tonna astyq jetkizetin bolady - A. Mamytbekov
ASTANA. Qańtardyń 18-i. QazAqparat /Ernur Aqanbaı/ - Qazaqstan bıyl Mysyrǵa 1,5 mln. tonna astyq jetkizetin bolady.
Bul týraly búgin Aýyl sharýashylyǵy mınıstrliginiń keńeıtilgen alqa májilisinde «QazAgro» holdınginiń basshysy Asyljan Mamytbekov aıtty, dep habarlaıdy QazAqparat.
«Azyq-túlik korporatsııasy» men «Venýs Interneıshnl» (Mysyr) kompanııasy arasyndaǵy qol qoıylǵan kelisim aıasynda 2010 jyly 1,5 mln. tonna kólemindegi Qazaqstan astyǵyn Mysyrǵa jetkizý qalpyna keltiriledi», dedi alqada A. Mamytbekov.
Onyń sózine qaraǵanda, Qazaqstan astyǵynyń eksportyn odan ári jyljytý úshin jańa eksporttyq arnalardy damytý máselesi pysyqtalyp jatyr. Bul rette Qazaqstan Qytaı jáne Tynyq muhıty elderine astyq eksporttaýdy bastaýdy josparlap otyr. «Qazirgi tańda astyq eksporttaýdyń uzaqmerzimdi jáne júıeli sharalary qolǵa alynýda. Qytaı aýmaǵy arqyly Tynyq muhıty elderine astyq tranzıtteý kelisildi. Sonymen qatar, Qytaıdyń ishki naryǵyna astyq jetkizý máselesi pysyqtalýda», dedi ol.
Sonymen qatar, Túrikmenstan aýmaǵy arqyly ótip, Aqtaý men Irannyń Gorgan stansysyn jalǵastyratyn temirjol jelisiniń qurylysy bastalǵandyǵyn aıtqan A. Mamytbekov: «Bul Iran jáne Kavkaz elderine 3 mln. tonnaǵa deıin astyq ótkizýge múmkindik beredi», dedi. Onyń aıtýynsha, qazirgi ýaqytta bul baǵyt boıynsha 1 mln. tonnadaı ǵana astyq eksporttalady.
