Qazaqstan bıyl qansha tonna munaı óndiredi
«2021 jyldyń qorytyndysy boıynsha munaı óndirý kólemi 85,9 mln tonnany, munaı eksporty 67,6 mln tonnany qurady. Munaı óndirýdiń 2022 jylǵa arnalǵan jospary - 87,5 mln tonna, eksport boıynsha - 69 mln tonna. Teńiz, Qarashyǵanaq jáne Qashaǵan úsh iri munaı-gaz jobasy elimizdiń munaı óndirý kóshbasshylary bolyp qalýda», - dedi ol mınıstrliktiń keńeıtilgen alqa otyrysynda.
Onyń atap ótýinshe, Teńiz jobasynda 2021 jyly munaı óndirý 26,5 mln tonnany, gaz óndirý kólemi 14,5 mlrd tekshe metrdi qurady.
«Ken ornynda quny 45,2 mlrd AQSh dollaryn quraıtyn Keleshekte keńeıtý jobasy iske asyrylýda. Bul munaı óndirýdi jylyna 12 mln tonnaǵa ulǵaıtýǵa múmkindik beredi. 2021 jyldyń qorytyndysyna sáıkes joba boıynsha jumystardyń jalpy ilgerileýi 89 paıyzdy, 2022 jylǵa arnalǵan jospar 97,4 paıyzdy qurady. Jobany 2023 jyly aıaqtaý josparlanyp otyr», - dedi mınıstr.
Bolat Aqsholaqovtyń aıtýynsha, 2021 jyldyń qorytyndysynda Qashaǵanda munaı óndirý kólemi 16,2 mln tonna, al gaz óndirý kólemi 9,8 mlrd tekshe metr boldy.
«Ótken jyly qýaty 1 mlrd tekshe bolatyn gaz óńdeý zaýytynyń qurylysy bastaldy. 2022 jyly osy gaz óńdeý zaýytynyń qurylys-montajdaý jumystarynda 40 paıyz progreske qol jetkizý josparlanyp otyr. Tolyq qýatqa shyqqan kezde zaýyt 800 mln tekshe kóleminde taýarlyq gaz, 119 myń tonna kóleminde suıytylǵan gaz óndiretin bolady. Sonymen qatar qýaty jylyna 2 mlrd tekshe metr Qashaǵan gaz óńdeý zaýyty jobasyn iske asyrý josparlanýda», - degen ol.
Osy oraıda mınıstr birinshi vıtse-mınıstr Murat Jórebekovke osy jyly bazalyq jobalaýdy bastaý jóninde tapsyrma berdi.
«Qarashyǵanaqta 11,5 mln tonna kóleminde munaı, 18,9 mlrd tekshe metr kóleminde gaz óndirildi. Búgingi kúni ken ornynda suıyq kómirsýtekterdi óndirý deńgeıin jylyna 11-12 mln tonna sheginde ustap turý boıynsha jobalar iske asyrylýda. Birinshiden, 2021 jyly quny 1,1 mlrd AQSh dollaryna gaz óńdeý qýatyn arttyrý jobasy iske qosyldy. Ekinshiden, quny 578 mln AQSh dollaryna gazdy keri aıdaý 4-shi kompressoryn paıdalanýǵa berý úshin iske qosý-jóndeý jumystary júrgizilýde. Úshinshiden, shıki gazdy keri aıdaýdyń 5-shi kompressoryn salý jumystary bastaldy. Jobanyń bıýdjeti - 970 mln AQSh dollary. Aıaqtalý merzimi - 2025 jyl», - dedi Bolat Aqsholaqov.
