Qazaqstan bıyl qansha somadaǵy taýardy eksporttaıdy
NUR-SULTAN. QazAqparat – Ulttyq ekonomıka mınıstri Rýslan Dálenov Qazaqstannyń bıyl qansha somadaǵy taýardy eksporttaıtynyn jáne ımporttaıtynyn aıtyp berdi, dep habarlaıdy QazAqparat tilshisi.
«2020 jyly nomınaldy jalpy ishki ónim 69,8 trln teńge kóleminde baǵalanýda. Ol buryn naqtylanǵan kórsetkishten 102 mlrd teńgege joǵary. Ulttyq banktiń baǵalaýy boıynsha ınflıatsııa 8% paıyzdy quraıdy. Ekonomıkanyń naqty sektorynyń salalary boıynsha ósý boljamy jaqsardy. Qurylystyń 6,5%-ke, aýyl sharýashylyǵynyń 4,9 jáne óńdeý ónerkásibiniń 3,7%-ke ósýi boljanýda», – dedi Rýslan Dálenov Úkimet otyrysynda.
Onyń aıtýynsha shekteý sharalarynyń saldarynan qyzmet kórsetý sektorlarynyń ósý qarqyny azaıǵan.
«Munaıdyń baǵasyn eskere otyryp, boljamdyq baǵany 20 dollardan 40 dollarǵa deıin arttyrý usynylady. Qańtar-qyrkúıekte munaıdyń ortasha baǵasy bir barrelge 42 dollardy qurady. Naqtylanǵan jospar boıynsha munaı óndirý kólemi 85 mln tonnany quraıdy. Taýarlar eksporty 45,5 mlrd dollarǵa deıin artady. Import 33,8 mlrd dollardy quraıdy. Osylaısha, oń saýda teńgerimi 3,2 mlrd dollarǵa ulǵaıyp, 11,7 mlrd dollar kóleminde boljanýda», - dedi ol.
