Qazaqstan bıyl qansha astyq eksportqa shyǵarady

NUR-SULTAN. QazAqparat – Jańa marketıng jyly Qazaqstan qansha tonna astyq eksportqa shyǵarady. Bul saýalǵa búgin QR Aýyl sharýashylyǵy mınıstri Saparhan Omarov jaýap berdi, dep habarlaıdy QazAqparat tilshisi.

«Qazaqstan qazirgi ýaqytta 5 mln tonna astyqty eksportqa jiberdi. Bıyl taǵy 8 mln tonna astyq eksporttaýdy josparlap otyrmyz. Menińshe, kelesi jyly da eksport kólemi osy deńgeıde saqtalatyn bolady», - dedi mınıstri Ortalyq kommýnıkatsııalar qyzmetindegi baspasóz máslıhaty barysynda BAQ ókilderiniń saýalyna oraı.

Onyń atap ótýinshe, byltyr elimizde 20,1 mln tonna astyq bastyryldy. Bıyl da sol mólsherde astyq túsimi bolady degen boljam bar.

«Kóktemgi egistik jumystary kúni keshe ǵana tolyǵymen aıaqtaldy. Alda jaz mezgili bar. Egistik alqaptaryn hımııalyq óńdeýden de ótkizýimiz kerek. Sondyqtan boljam jasaýǵa áli erte dep oılaımyn. Degenmen, bıylǵy astyq túsimi ótken jyldardaǵy deńgeıde saqtalady dep úmittenemin», - dedi Saparhan Omarov.