Qazaqstan bıyl 25,5 mln tonna tranzıt júgin tasymaldaıdy

NUR-SULTAN. QazAqparat – Qazaqstan bıyl 25,5 mln tonna tranzıttik júkti tasymaldaıdy. Bul týraly halyqqa esep berý kezdesýinde QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Kólik salasynyń negizgi mindeti - eldiń tranzıttik áleýetin iske asyrý úshin ulttyq kólik júıesin álemdik kólik jelisine ıntegratsııalaý. Jalpy sala qarqyndy damyp kele jatqanyn atap ótkim keledi. Árıne, pandemııa kólik salasyna úlken ózgerister engizdi. Kóliktiń barlyq túrleri, onyń ishinde jolaýshylar da, júk tasymaly da zardap shekti», - dedi mınıstr.

Máselen, onyń atap ótýinshe, 2021 jylǵy qańtar-sáýir aılarynda kólik salasynyń jalpy qosylǵan qunynyń naqty kólem ındeksi ótken jyldyń kórsetkishmen salystyrǵanda 91 paıyzdy qurady.

Kóliktiń barlyq túrimen júk tasymaldaý kólemi 1,07 mlrd tonna boldy.

«Pandemııaǵa qaramastan, biz tranzıttik júk tasymaldaýdyń turaqtylyǵy men tıimdiligin kórsete aldyq. Mysalǵa, 2021 jyldyń alǵashqy 4 aıynda tranzıttiń jalpy kólemi 7,3 mln tonnany qurady. Bul óz kezeginde ótken jyldyń kórsetkishinen 4,1 paıyzǵa artyq. Onyń ishinde 337 myń konteıner jıyrma fýttyq ekvıvalent tasymaldandy. Bul 2020 jylmen salystyrǵanda 52 paıyzǵa artyq. Bıyl 25,5 mln tonna kóleminde tranzıttik júk, onyń ishinde 1 mln jıyrma fýttyq ekvıvalenttegi tranzıttik konteıner tasymaldaý josparlanyp otyr», - dedi Beıbit Atamqulov.