Qazaqstan bıyl 180 myń tonna benzol men paraksılol eksporttaıdy

NUR-SULTAN. QazAqparat – Qazaqstan bıyl 180 myń tonna benzol men paraksılol eksporttaıdy. Bul týraly búgin Úkimet úıindegi baspasóz máslıhatynda QR Energetıka birinshi vıtse-mınıstri Mahambet Dosmuhambetov aıtty, dep habarlaıdy QazAqparat tilshisi.

«Bıtým óndirý 702 myń tonnany nemese jospardyń 103 paıyzyn qurady. Óndirý kólemi elimizdiń jol salasynyń qajettiligin tolyǵymen qanaǵattandyrady. 2019 jylǵa arnalǵan jospar – 767 myń tonna», - dedi ol.

Onyń dereginshe, Atyraý munaı óńdeý zaýytynda osy jyldyń 9 aıy ishinde 107 myń tonna hosh ıisti kómirsýtek (benzol, paraksılol) óndirildi. Atalǵan ónim eksportqa baǵdarlanǵan. 2019 jylǵa arnalǵan jospar – 180 myń tonna. Sonymen qatar, osy jyldyń tamyz aıynda Almaty oblysynda maılaıtyn maı óndiretin zaýyt paıdalanýǵa berilgen. Onyń qýaty jylyna 100 myń tonnany quraıdy.

«Osy óndiris ishki naryqtyń jaǵarmaıǵa degen qajettiligin qamtamasyz etýge jáne jaqyn shetelge eksportty júzege asyrýǵa múmkindik beredi», - dedi Mahambet Dosmuhambetov.