Qazaqstan bıyl 15 myń tonna etti eksportqa shyǵarady

ASTANA. QazAqparat -  Qazaqstan bıyl 15 myń tonna etti eksportqa shyǵarady. Bul týraly búgin Úkimettiń keńeıtilgen májilisinde QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev aıtty, dep habarlaıdy QazAqparat.

«Senen buryn bolǵan mınıstr Mamytbekov «2016 jyly búkil ishki suranysty etpen qamtamasyz etemin de, 60 myń tonnany shetelge shyǵaramyn» dedi. Ne boldy?», - dep surady Nursultan Nazarbaev otyrys barysynda Ómirzaq Shókeevten.

Osy rette Ómirzaq Shókeev atalǵan baǵdarlama aıasynda elimizge 58 myń bas asyl tuqymdy iri qara jetkizilgendigin aıtty.

«Ol mal qazir 300 myń boldy. Men barlyq esebin aldym. Dál osy ýaqytta Reseı 500 myń bas mal satyp aldy. Sondyqtan bul baǵdarlama durys dep oılaımyn. Men ony qaıta eseptep, ózińizge beretin bolamyn. Al et eksporty qazir 5 myń tonna bolsa,  2018 jyly 15 myń tonnaǵa jetkizemiz», - dedi Shókeev.

«Reseı bizden 10 ese úlken, onymen salystyryp qaıtesiń. Sol satyp alǵan mal ornynda ma? Baıaǵyda Sovet úkimeti kezinde de satyp alǵanbyz. Sodan 10 jyldan keıin ol sıyrlar eshki bolyp ketken», - dep atap ótti Elbasy.

Óz kezeginde Shókeev mundaıǵa jol berilmeıtindigin aıtyp, Prezıdentti sendirdi.

«Ondaıǵa jol bermeımiz. Qazir bizde elektrondy esepke alý bolady. Jańa tehnologııalar engizemiz», - dedi ol.

Qazaqstan Prezıdentiniń dereginshe, 5 jyldyń ishinde agroónerkásip keshenin damytýǵa 1,2 trln teńge jumsalǵan.