Qazaqstan bıyl 11 jańa ushaq satyp alady

ASTANA. QazAqparat – 2023 jyly Qazaqstanǵa 11 jańa ushaq jetkiziledi. Bul týraly QR Indýstrııa jáne ınfraqurylymdyq damý vıtse-mınıstri Almaz Ydyrysov aıtty, dep habarlaıdy QazAqparat tilshisi.

«Áýe reısteri sanyn kóbeıtý úshin kompanııalarmen birlesip ushaqtar parkin tolyqtyrý jospary qabyldandy. Byltyr 14 satyp alynsa, bıyl 11 ushaq jetkiziledi. Jalpy, 2025 jyldyń sońyna deıin parke taǵy da 42 ushaq qosylady. Osy oraıda ushaqtardyń sany 132-ge jetedi», - dedi A. Ydyrysov Senatta elimizdegi áýe kóligi máselelerine qatysty jıyn barysynda.

Onyń paıymynsha, áýe kóliginiń sany kóbeıgen jaǵdaıda turaqty reıster artyp, bılet arzandaıtyn bolady.

Budan buryn habarlanǵandaı, bıyl 10-ǵa jýyq halyqaralyq baǵyt boıynsha reıster ashylmaq.

Qazirgi kezde áýe kóligi salasynda 6 qazaqstandyq tasymaldaýshy 56 ishki baǵdar boıynsha aptasyna 706 reısti oryndap keledi.