Qazaqstan Bitimgerlik brıgadasy jańa úlgidegi qarý-jaraq pen áskerı daıyndyǵyn tanystyrdy
Búgin BAQ ókilderi úshin arnaıy press-týr uıymdastyrǵan QR Qarýly kúshteriniń Desanttyq-shabýyldaýshy áskerleriniń qolbasshylyǵy aldymen 61993 áskerı bólimshesinde qarý-jaraq úlgilerin tanystyrdy.
Munda negizinen Qazaqstannyń Bitimgerlik brıgadasynyń áskerı múlikteri men qarý-jaraq múmkindikteri qoıylǵan. Sonyń ishinde, birinshi kózge túskeni - AQSh-ta jasalǵan Hammer kólikteri.
500 attyń kúshi bar, avtomatty berilis qorabymen júretin mundaı Hammerdiń 65 danasy Bitimgerlik brıgadasyna alynǵan. 100 shaqyrymǵa 25 lıtr dızel otynyn jaǵatyn Hammerler jyldam júrisimen óziniń qajettiligin kórsetip otyr. Hammer jaýyngerlik tapsyrmalardy oryndaý, bólimshelerdi basqarýdy uıymdastyrý, tehnıka lekterine erip júrý jáne t.b. kezderinde jeke quramdy tasymaldaýǵa arnalǵan. Artyqshylyqtary: ótkishtigi joǵary, atý qarýlaryn ornatý múmkindigi bar, klımattyq aýyr jaǵdaılarǵa beıimdelgish.
Sonymen qatar, Hammer kóliginiń medıtsınalyq nusqasy da tanysytyryldy. Jaralanǵan 4 adamdy maıdan dalasynan alyp shyǵyp, medıtsınalyq járdem kórsete alatyn brondalǵan kóliktiń bul túri búgingi tańda Qazaqstan Armııasynda beıbit kúnde de qyzmet etip júr.
Bitimgerlik brıgadasynda paıdalanýǵa berilgen taǵy bir jańa tehnıka - ol ózen, kól, teńiz, tipti shalshyq sýlardy da tazartyp ishýge jaratatyn sý tazartqysh ámbebap qurylǵy. Saǵatyna 2250 lıtr sýdy tazartyp, ishýge jaramdy etetin bul qurylǵynyń salmaǵy 8,5 tonna, ol tirkeme retinde kez kelgen kólikke tirkelip júredi. Qozǵaltqyshynyń qýaty 30 kVt. 
Búgingi press-týrda buǵan deıin de qoldanysta kele jatqan qarý túrleri de kórsetilimge qoıylǵan. Atap aıtqanda, Gaýbıtsa D-30 qarýy. Ol - ashyq jáne tasadaǵy jaýdyń aldyńǵy shebindegi tiri kúshterin, qarýlar men áskerı tehnıkalaryn brıgada múddesinde joıýǵa arnalǵan. Onyń maksımaldy atý qashyqtyǵy - 15,3 shaqyrym, atý shapshańdyǵy mınýtyna 6-8 oq, topta 6 adam bolady.
Sonymen qatar, búgin ZÝ 23-2 zenıttik qurylǵysy, AK-74 atys qarýy men SVD mergender vıntovkasy áýe-desanttyq tehnıka múlikteri de jýrnalısterge kórsetildi. Qazaqstanda jasalǵan Kamaz bazasyndaǵy MTs R-140 radıostantsııasy men Kamaz bazasyndaǵy shtab kóligi jáne tehnıkalyq kómek kórsetý kóligi de nazardan tys qalmady. Tehnıkalyq kómek kórsetý kóliginde isten shyqqan kólikterge dereý, oqıǵa ornynda tehnıkalyq jóndeý qyzmetin kórsetýge arnalǵan.
Press-týr aıasynda arnaıy brıfıngte sóz alǵan QR Qarýly Kúshteri Desanttyq-shabýyldaý áskeriniń qolbasshysy Almaz Jumakeev brıfıngte búgingi tańda Bitimgerlik mıssııasy úshin Qazaqstanda arnaıy rota daıyn ekenin aıtty. 
«Byltyr QR Qarýly kúshterinde Bitimgerlik mıssııalardy qashan jáne qaıda paıdalanýǵa bolatyny týraly Zańǵa qol qoıyldy. 2003 jyldan beri Bitimgerlik mıssııalaryn atqaratyn «QazBat» jasaqtalǵanyn bilesizder. Búgingi kúnde Qazaqstan Bitimgerlik mıssııasy elimizdiń shekarasynan tys jerlerde qyzmet atqaryp júr. Qazaqstan Bitimgerlik brıgadasy NATO, UQShU, ShYU bólimderimen birigip jumys jasaýǵa beıimdelgen. Bizdiń barlyq ofıtserlik quram aǵylshyn tilin jetik biledi. Búginde bizdiń Bitimgerlik rotanyń daıyndyǵy joǵary deńgeıde», - dedi QR Qarýly Kúshteri Desanttyq-shabýyldaý áskeriniń qolbasshysy Almaz Jumakeev.
Qazaqstan Bitimgerlik brıgadasynyń komandıri podpolkovnık Bolat Dúısenbaevtiń aıtýynsha, búginde Bitimgerlik mıssııalary úshin Qazaqstan Qarýly kúshterinde 170 adam daıyn. Olarǵa qazaq, orys, aǵylshyn tilderinde sabaqtar ótkiziledi.
«22 shildeden 4 tamyzǵa deıin biz arnaıy jattyǵýlar ótkizemiz. Oǵan AQSh, Ulybrıtanııa, Qyrǵyzstan, Ózbekstannan ofıtserler, men serjanttar, nusqaýshylar quramy keledi. Jattyǵýǵa 1000-nan astam adam qatysady. Búgingi tańda 170 adamnan turatyn Bitimgerlik rotasy bitimgerlik mıssııalarǵa daıyn. Osyndaı jattyǵýlar bizdiń áskerdi shyńdaı túsedi. Ótken senbi kúni QR Qorǵanys mınıstri 170 adamnyń daıyndyǵyn tekserdi. Oqý jattyǵýlar tájirıbelik tásildi damytýǵa arnalǵan», - Qazaqstan Bitimgerlik brıgadasynyń komsandıri Dúısenbaev Bolat.
Aıta keteıik, Desanttyq-shabýyldaý áskerleri - el Qarýly Kúshteri Joǵarǵy Bas qolbasshysynyń rezervi. Áskerı-saıası jaǵdaılardyń kúrt ózgerýi kezindegi daǵdarysty jedel sheshýge; memlekettiń ulttyq múddesin qorǵaý maqsatynda kenetten týyndaǵan jaǵdaılardy oryndaýǵa jáne operatsııa baǵytyna áskerlerdi toptastyrýdy nyǵaıtýǵa arnalǵan.
Elde jáne syrt jerlerde de beıbitshilik pen turaqtylyqty qoldaý maqsatyndaǵy Qazaqstan Respýblıkasynyń halyqaralyq mindetterin oryndaýǵa qatysa alady. Beıbit jáne soǵys jaǵdaıynda qaýip tóngen baǵyttar men aýdandarǵa shuǵyl jetýge jáne kenetten týyndaǵan tapsyrmalardy oryndaýǵa árdaıym daıyn turady. Olardyń quramyna desantty-shabýyldaýshy bólimsheler, bólimder men quramalar, sondaı-aq, arnaıy bólimder, tyl jáne tehnıkalyq qamtamasyz etý bólimderi kiredi. Desanttyq-shabýyldaý áskerleriniń arnaıy maqsattaǵy derbes ınjenerlik-saperlik jasaǵy 2003-2008 jyldar aralyǵynda Irak Respýblıkasynda beıbitshilik jáne qaýipsizdikti saqtaý boıynsha Koalıtsııalyq kúshter quramynda bitimgershilik mıssııany atqarǵan bolatyn.
