Qazaqstan Bishkektegi «Uly Jibek joly» kórmesiniń qonaqtaryn qalaı tańǵaldyrdy
BІShKEK. QazAqparat - Bishkektegi G.Aıtıev atyndaǵy Beıneleý óneri mýzeıinde ótip jatqan «Uly Jibek joly» ınteraktıvti kórmesinde Qazaqstan buryshy óner súıer qaýymnyń súıikti ornyna aınaldy, dep habarlaıdy QazAqparat tilshisi.
Kórme aıasynda Qazaqstan kúnderi ótti. Onyń arqasynda kelýshiler elimizben jaqynyraq tanysý múmkindigine ıe boldy.
Іs-shara qonaqtary úshin qyrǵyz sýretshisi Saparbaı Osmonalıevtiń basshylyǵymen Nur-Sultan qalasynyń kórikti oryndaryn beınelep salý boıynsha sheberlik sabaqtar uıymdastyryldy. Sýretshi byltyr týyndylaryn elordaǵa arnap, Nursultan Nazarbaev atyndaǵy «Qurmet» ordenimen marapattalǵan edi.
Kórmeniń eń jas qatysýshylary úshin qazaq tilindegi «Er Tóstik» mýltfılmi kórsetildi. Budan bólek, qazaqstandyq fılmder kórermen nazaryna usynylyp, Abaı óleńderin oqý sharasy ótti. 
Sondaı-aq, kelýshiler qazaq ulttyq oıyndarynyń erejelerimen jáne tarıhymen tanysty, tipti ózderi oınap ta kórdi. «Rýhanı jańǵyrý» vıktorınasyna qyzyǵýshylyq tanytty.
Qazaqstan kúnderi aıasynda «Alataý» Jambyl oblystyq folklorlyq ansambli óner kórsetti. Qatysýshylar ulttyq taǵamdardan dám tatyp, qazaq jáne qyrǵyz halyqtary mádenıetiniń uqsastyǵyn atap ótti.
Kórmege Qazaqstannan bólek, Ózbekstan, Tájikstan, Túrikmenstan, Ázerbaıjan, Qytaı, Úndistan, Iran, Túrkııa, Mońǵolııa, Japonııa, Ońtústik Koreıa, Pákistan óz eksponattaryn usyndy.
Іs-sharanyń maqsaty - ınteraktıvtik ádisterdi qoldana otyryp, Uly Jibek jolyndaǵy memleketter týraly aqparat berý.
