Qazaqstan Bishkektegi qaıyrymdylyq jármeńkesine qatysty
QR Syrtqy ister mınıstrligi men Bishkek ákimdigi birlesip uıymdastyrǵan is-shara alaı qyrǵyzdarynyń patshaıymy – Qurmanjan Datqa eskertkishi aldyndaǵy alleıada ótti. Oǵan Qazaqstan, Ózbekstan, Túrikmenstan, Reseı, Qytaı, Japonııa, Shveıtsarııa, Frantsııa, Germanııa, AQSh, Túrkııa, Ońtústik Koreıa, Iran men Úndistan ókildikteri syndy 14 sheteldik dıplomatııalyq mıssııa, sondaı-aq óz ónimin tanystyrǵan jergilikti taýar óndirýshiler men qyrǵyz qolónershileri qatysty.
Jármeńke qonaqtary álemniń túrli elderiniń taǵamdary men sýsyndarynan dám tatty, olarǵa ebrý, ıaǵnı sýdyń betine sýret salyp, sodan keıin ony qaǵazǵa túsirý tásilin úıretetin sheberlik saǵaty uıymdastyryldy. Sonymen qatar, qolóner jumystary men qyrǵyz óndirýshilerdiń ekoónimderi kórsetildi.
Ulttyq delıkates pen kádesyılar qoıylǵan qazaqtyń shatyrynyń mańynda sheteldikter ulttyq astan súısine dám tatty.
«Búgin Qazaqstan elshiligi Qyrǵyzstanda akkredıttelgen dıplomatııalyq korpýspen birge qaıyrymdylyq jármeńke-kórmesine qatysyp, kádesyı men ulttyq taǵamdar satylymyn uıymdastyrdy. Bizdiń as mázirimizde shubat pen qymyz, asylǵan et, qýyrdaq, baýyrsaq, samsa, jent, irimshik, qurt, merekelik naýryz-kóje men basqa da otandyq ónimder boldy. Tátti taǵamdardy dıplomattarymyzdyń otbasy músheleri óz qoldarymen daıyndaǵan. Aspazdyq jáne kádesyı ónimderin satýdan jınalǵan aqshanyń bári qyrǵyz tarapynyń qaıyrymdylyq qoryna aýdarylady. Búgingi aktsııa izgilikke shaqyratyn ári tanymdyq is. Bolashaqta koronavırýs pandemııasy sııaqty basqa da jaısyz jaǵdaılar mundaı jaqsy isterge jumylýǵa kedergi keltirmeıdi dep oılaımyn», - dedi QazAqparattyń menshikti tilshisine suhbat bergen Qyrǵyz Respýblıkasyndaǵy QR elshiliginiń keńesshi-elshisi Ashat Syzdyqov.
