Qazaqstan birqatar oblystarynyń aýsyldan taza aımaq mártebesin alǵany týraly DSU múshelerin habardar etti

ASTANA. QazAqparat - Qazaqstan DSU múshelerin birqatar oblystarynyń HEB-ten aýsyldan taza aımaq mártebesin alǵany týraly habardar etti, dep habarlaıdy QR SІM baspasóz qyzmeti.

Qazaqstan delegatsııasy Sanıtarlyq jáne fıtosanıtarlyq sharalar boıynsha Dúnıejúzilik saýda uıymy (DSU) komıtetiniń kezekti otyrysyna qatysty. Qazaqstan Respýblıkasy Aýyl sharýashylyǵy mınıstrliginiń ókilderi Halyqaralyq epızootıkalyq bıýroda (HEB) Qazaqstannyń aýsyl aýrýynan taza aımaq mártebesin alýy boıynsha jumystardy ótkizý týraly baıandama jasady.

2015 jyly HEB-ke múshe elderdiń Bas Assambleıasynyń 83-sessııasynda (Parıj q.) Qazaqstan Respýblıkasynyń 9 oblysyna (Aqmola, Qaraǵandy, Pavlodar, Qostanaı, Soltústik Qazaqstan, Batys Qazaqstan, Aqtóbe, Atyraý, Mańǵystaý oblystary) vaktsınasyz aýsyl aýrýynan taza aımaq mártebesi týraly Sertıfıkat berildi.

2017 jyly mamyr aıynda HEB-ke múshe elder Bas Assambleıasynyń 85-shi sessııasynda (Parıj q.) Qazaqstan Respýblıkasynyń bes oblysyna (Almaty, Shyǵys Qazaqstan, Jambyl, Qyzylorda jáne Ońtústik Qazaqstan oblystary) vaktsınatsııalaý arqyly aýsyl aýrýynan erkin aımaq mártebesi týraly Sertıfıkat resmı túrde tapsyryldy. Budan ári osy bes oblys boıynsha aýyl sharýashylyq janýarlaryn vaktsınatsııalaýdan bas tartylǵan, sonymen qatar Qazaqstannyń vaktsınatsııalaýsyz aýsyl aýrýynan taza aımaq mártebesin alýy josparlanýda.

Qazaqstan Respýblıkasynyń HEB-te joǵarykontagıozdy aýrýlardan taza aýmaq nemese memleket mártebesin alýy Qazaqstannyń mal sharýashylyǵy óniminiń eksporttyq áleýetiniń artýyna jáne eldiń aýyl sharýashylyǵy sektorynyń ınvestıtsııalyq tartymdylyǵyn jaqsartýǵa yqpal etedi.