Qazaqstan birqatar elmen áýe qatynasy sanyn arttyrady

Mundaı sheshim QR Premer-Mınıstriniń orynbasary Eraly Toǵjanovtyń tóraǵalyǵymen ótken QR aýmaǵynda koronavırýs ınfektsııasynyń taralýyna jol bermeý jónindegi vedomstvoaralyq komıssııanyń (VAK) otyrysynda qabyldandy, dep habarlaıdy QazAqparat tilshisi.

Atap aıtqanda, QR Indýstrııa jáne ınfraqurylymdyq damý mınıstrliginiń Túrkııamen (qosymsha 4 reıs), Ózbekstanmen (+4 reıs), Qyrǵyzstanmen (+2 reıs) jáne Ýkraınamen (+1 reıs) halyqaralyq áýe reısteriniń sanyn arttyrý týraly usynysy komıssııanyń qoldaýyna ıe boldy.

Sondaı-aq QR Premer-Mınıstriniń resmı saıty taratqan aqparatqa sáıkes, otyrysta Densaýlyq saqtaý mınıstri Alekseı Tsoı bıologııalyq qaýipsizdik týraly zań jobasyn ázirleý barysyn baıandady. Óz kezeginde vıtse-premer E. Toǵjanov atalǵan zań jobasy boıynsha barlyq jumyldyrylǵan memlekettik organdarmen kelisý jumystaryn jáne bıýdjettik esepterdi engizýde buǵan deıin bekitilgen merzimderdi ustaný qajettigin atap ótti.