Qazaqstan birqatar eldermen sottalýshylardy ózara berý kelisimderin jasamaq

ASTANA. QazAqparat - Qazaqstan birqatar elmen sottalýshylardy ózara berý týraly kelisimge kelmek. Bul týraly búgin QR Parlamenti Májilisiniń jalpy otyrysynda «Qazaqstan Respýblıkasy men Saýd Arabııasy Koroldigi arasyndaǵy sottalǵan adamdardy berý týraly kelisimdi ratıfıkatsııalaý týraly» QR Zańynyń jobasyn tanystyrǵan QR Bas prokýrorynyń orynbasary Andreı Lýkın málim etti, dep habarlaıdy QazAqparat.

Onyń aıtýynsha, bul Zań jobasy Qazaqstanda ne Saýd Arabııasynda sottalǵan azamattardyń jazasyn óz otanynda óteýine múmkindik beretin bolady.

«ıAǵnı, eger QR azamaty Saýd Arabııasynda qylmys jasaıtyn bolsa, onda ol bas bostandyǵynan aıyrý jazasyna kesiletindigi anyq. Ol bul jazasyn belgili bir kelesim aıasynda elimizde óteı alady. Dál solaı Saýd Arabııasynyń azamaty Qazaqstanda sottalatyn bolsa, ol da jazasyn óz elinde óteýge múmkindik alady», - dedi Andreı Lýkın.

Sonymen qatar sottalýshy týǵan eline jazasyn óteý úshin sol memlekettiń azamaty, úkim naqty bolsa,  sottalýshy úkim shyǵarǵan eldiń shaǵym protsedýralaryna qatysy bolmasa ǵana beriledi. Sottalýshyny berýshi eldiń egemendigine, qaýipsizdigine jáne sol eldiń zańdaryna qaıshy keletin jaıttar bolsa, onda sottalýshy týǵan eline jazasyn óteý úshin qaıtarylmaıdy.

«Bul kelisim úlgilik bolyp sanalady. Dál osyndaı kelisimdi Qytaımen, Túrkııamen, Vengrııa, Ispanııamen, Rýmynııa, Lıtva, Iranmen jasastyq. TMD aıasynda sottalýshylardy berý protsedýrasy Máskeý konventsııasy negizinde júzege asyrylady. Ol 1998 jyldyń 3 naýryzynda jasalǵan bolatyn. Qazirgi ýaqytta dál osyndaı kelisimdi Iordanııa, Brazılııa, Mońǵolııa, Ońtústik Koreıa jáne Birikken Arab Ámirlikterimen jasasý múmkindigi qarastyrylyp jatyr», - dedi Bas prokýrordyń orynbasary.