Qazaqstan birinshiligi: Erkin kúresten úsh salmaqtyń chempıondary anyqtaldy
NUR-SULTAN. QazAqparat - Búgin kúres túrlerinen Qazaqstan birinshiliginde erkin kúresten úsh salmaqtyń jeńimpazdary anyqtaldy, dep habarlaıdy QazAqparat tilshisi.
Aqmola oblysynan kelgen Dáýlet Temirjanov 57 kelide qarsylas shaq keltirgen joq. Dáýlet fınalda qaraǵandylyq Javohır Irıstaevty 12:2 esebimen tize búktirdi. Jambyldyq Rahat Qaljan men shymkenttik Ǵabıt Tólepbaı qola júlde ıelendi.
Aıta keterligi, atalǵan salmaqta belgili balýan Nurıslam Sanaı 1/8 fınaldan árige asa alǵan joq. Ol osy salmaqta aldaǵy Olımpıada joldamasyna ıe bolǵan edi.
Al 61 kelide Almaty oblysynyń balýany Adlan Asqarov jeńimpaz tuǵyryna kóterildi. Adlan aqtyq synda atyraýlyq Salamat Málikovten myqtylyǵyn tanytty. Úzdik úshtikti Shyǵys Qazaqstan oblysynyń sportshysy Rasýl Qalıev pen qaraǵandylyq Azat Oganıssıan túıindedi.
Alǵashqy jarys kúnin 86 kelidegi balýandar qorytyndylady. Bul salmaqta Shyǵys Qazaqstan oblysynan kelgen Azamat Dáýletbekov altyn aldy. Ekinshi oryn Almaty oblysynyń sportshysy Esqalı Dáýletqazyǵa buıyrsa, mańǵystaýlyq Nurdáýlet Kókteýbaev pen almatylyq Ádilet Dáýlembaev úzdik úshtikten kórindi.
Esterińizge sala ketelik, búgin Almaty qalasyndaǵy «Dostyq» sport kesheninde kúres túrlerinen Qazaqstan birinshiligi jalaýyn kóterdi. Jarys 26 qarashaǵa deıin jalǵasady. Endi erkin kúres sheberleri 21-22 qarasha kúnderi qalǵan salmaqtarda synǵa túsedi. Al áıelder kúresinen 23 qarashada 10 qarashada júldeler sarapqa salynsa, grek-rım kúresiniń sheberleri 24-26 qarasha aralyǵynda toǵyz salmaqta júldege talasady.
