Qazaqstan bıoalýantúrlilikti qorǵaýda tehnologııalyq sheshimderge kóshpek
ASTANA. KAZINFORM — Qazaqstan Prezıdenti bıoalýantúrlilikti saqtaý úshin ozyq tehnologııalardy keńinen qoldanýǵa shaqyrdy.
– Búginde tıimdi seriktestik tsıfrlyq tehnologııa men jasandy ıntellektige arqa súıeýi qajet. Sebebi olar ekojúıelerdi monıtorıngteý, tabıǵı resýrstardy basqarý jáne ekologııalyq qaýip-qaterdi boljaý ádisterin túbegeıli ózgerte alady. Qazaqstan úshin jasandy ıntellektini damytý jáne tsıfrlyq transformatsııa – ulttyq basymdyq. Astanadaǵy Alem.AI halyqaralyq jasandy ıntellekt ortalyǵyn birlesken ǵylymı zertteýler júrgizý, bıoalýantúrlilik derekterin taldaý, aldyn ala eskertý júıelerin ázirleý, sala mamandaryn daıarlaý platformasy retinde paıdalanýdy usynamyz, – dedi Qasym-Jomart Toqaev.
Sóz sońynda Memleket basshysy Bıoalýantúrlilik jónindegi konventsııa Hatshylyǵynyń óńirlik keńsesin Almatyda ornalastyrýdy usyndy.
Prezıdenttiń pikirinshe, bul keńse Ortalyq Azııa elderine bıoalýantúrlilik jónindegi Kýnmın-Monreal jahandyq negizdemelik baǵdarlamasyn júzege asyrýǵa qoldaý kórsetip, ǵylymı tájirıbe almasýǵa jáne tabıǵatty qorǵaý jónindegi birlesken jobalardy júzege asyrýǵa yqpal ete alady.
