Qazaqstan bilim berýmen qamtýda joǵary kórsetkishte bolǵanymen, onyń sapasy jaǵynan áli de artta qalyp otyr

ASTANA. 8 sáýir. QazAqparat - Qazaqstan bilim berýmen qamtýda joǵary kórsetkishte bolǵanymen, onyń sapasy jaǵynan áli de artta qalyp otyr. Búgin Syrtqy ister mınıstrliginde ótken BUU Damý Baǵdarlamasynyń «Ońtústiktiń órleýi: alýan túrli álemdegi adamı progress» atty ǵalamdyq baıandamasynyń aımaqtyq tusaýkeseri barysynda QR Ekonomıka jáne bıýdjettik josparlaý vıtse-mınıstri Mádına Ábilqasymova osylaı málim etti.

«Qazaqstan sońǵy jyldary adam damýy kórsetkishin jaqsartýda birshama jetistikterge jetti. Alaıda, adam damýynda Qazaqstannyń pozıtsııasyna tusaý bolyp otyrǵan birshama problemalar da barshylyq. Máselen, ómir súrý uzaqtyǵy boıynsha álemniń 194 elinde Qazaqstan 152-i orynda tur jáne uzaqtyq kórsetkishi 67 jasqa teń. Al jan basyna shaqqandaǵy JІÓ ortasha elder úshin 67 jas degenińiz eń tómengi kórsetkish. Budan bólek, adamı kapıtaldyń tómendeýine densaýlyq saqtaý júıesi de, ekologııalyq jaǵdaı da teris áser etedi», - deıdi vıtse-mınıstr.

Onyń aıtýynsha, densaýlyq saqtaý júıesinde jalpy adam ólimi, ana óliminiń kórsetkishi, týberkýlez aýrýynyń deńgeılik kórsetkishi saqtalyp otyr. «Biz týberkýlez boıynsha JІÓ-niń jan basyna shaqqandaǵy ortasha tabysqa ıe elderde birinshi orynda turmyz. Halyqtyń jas, eńbekke qabiletti sanatynyń ólim kórsetkishi de joǵary bolyp otyr», - deıdi M. Ábilqasymova.

Sonymen qatar, vıtse-mınıstr balalardy orta bilimmen qamtýda Qazaqstan 144 eldiń ishinde 18 orynda turǵanyn, alaıda bilim sapalyǵy jaǵynan 144 eldiń ishinde - 101, bastapqy bilim berý sapasy jaǵynan - 72, matematıkalyq-ǵylymı bilim berýde 81 orynda turǵanyn atap ótti.

«Eńbek naryǵynda da belgili bir problemalar saqtalýda. Onyń bastysy - ónimsiz jumyspen qamtylýdyń bolýy, ózin ózi jumyspen qamtýshylar úlesiniń joǵarylyǵy», - dedi ol.