Qazaqstan bilim berýdiń Bolon júıesinen shyqpaıdy – Qasym-Jomart Toqaev
«Kezinde Bolon júıesine kúmánmen qaraǵan edim. Oǵan qosylǵan kezde Senat tóraǵasy boldym jáne Úkimetke bul iste asyǵystyq tanytýdyń qajeti joq ekendigin eskerttim. Sol ýaqytty oǵan qosylýymyz úlken ulttyq jetistik, tipti mereke retinde kórsetildi. Іs júzinde onyń da óte kóp kemshiligi bar jáne olardy baıqaǵan edim. Bul medaldiń eki jaǵy bar. Negizinde Reseı Úkimetiniń Bolon júıesinen shyǵýy týraly sheshimin túsinemin. Biraq, onyń saldary da bolatynyn túsiný qajet», - dedi Qasym-Jomart Toqaev reseılik jýrnalıst Andreı Kondrashovqa bergen suhbatynda.
Memleket basshysy elimizde bilim berý salasyna óte úlken nazar aýdarylyp otyrǵanyn basa aıtty.
«Óıtkeni, bilimniń róli óte zor. Men reseılik tehnıkalyq joǵary oqý oryndarynyń Qazaqstanda fılıaldaryn ashýyna qatysty bastama kóterdim. Bul protsess bastaldy. Máskeý ınjenerlik-fızıkalyq ınstıtýty QazMÝ-de fılıalyn ashty. Gýbkın atyndaǵy munaı jáne gaz ýnıversıteti de fılıalyn ashady. Menińshe, bul protsess jalǵasa beredi. Óıtkeni, qazirgi qazaq jastary básekege qabiletti bolýy úshin, eń aldymen, tehnıkalyq bilim alýy tıis dep esepteımin. «Bolashaq» baǵdarlamasy arqyly talantty jastardy shetelge jiberý múmkindigi de saqtalyp otyr. Atap aıtqanda, olar magıstranttar, tipti bakalavrıattar da. Biz bakalavr baǵdarlamasyn qysqartyp, álemniń úzdik joǵary oqý oryndaryna baratyn magıstranttardyń sanyn arttyramyz», - dedi QR Prezıdenti.