Qazaqstan bıyl 82 myńnan astam jeńil kólik shyǵardy – mınıstr

ASTANA. KAZINFORM – Ónerkásip jáne qurylys mınıstri Qanat Sharlapaev Úkimet otyrysynda 9 aıda eldegi kásiporyndar 82 myńnan astam jeńil kólik shyǵardy degen málimet aıtty.

«2028 jylǵa qaraı otandyq mashına jasaý ónimderiniń kólemin eki ese arttyrýdy josparlap otyrmyz. Búginde elimizde óńdeý ónerkásibiniń ekonomıkadaǵy úlesi taý-ken salasynan asyp, turaqty ósim kórsetip otyr. Óz kezeginde mashına jasaý salasy óńdeý ónerkásibiniń 20 paıyz úlesin alady. Saladaǵy 4 myńǵa jýyq kompanııada 120 myńnan astam adam jumys isteıdi», - dedi mınıstr.

Aıtýynsha, jyl basynan beri salaǵa 124 mlrd teńge ınvestıtsııa jumsalǵan.

«Osy jyldyń 9 aıynda shamamen 124 mlrd teńge ınvestıtsııa tartylyp, onyń ósimi eki ese boldy. Óndiris kólemi 3 trln teńgege jetti. 
9 aıdyń qorytyndysy boıynsha elde 82 myńnan astam jeńil avtokólik shyǵaryldy», - dedi Qanat Sharlapaev.