Qazaqstan bıyl 16 mln gektar alqaptan 27,1 mln tonna astyq aldy
ASTANA. KAZINFORM – Aýyl sharýashylyǵy mınıstri Aıdarbek Saparov Úkimet otyrysynda bıylǵy oraq naýqanynyń qorytyndysyn málim etti.
- Búgingi tańda respýblıka boıynsha astyq jınaý tolyǵymen aıaqtaldy. 16 mln gektar alqaptan gektaryna 17 tsentner ortasha ónimdilikpen 27 mln tonna astyq qambaǵa quıyldy. Bıdaı 12,2 mln gektardan jınalyp, 20,3 mln tonnasy bastyryldy – bul ótken jylmen salystyrǵanda jarty mıllıon tonnaǵa kóp. Egis alqaptaryn ártaraptandyrý nátıjesinde bıdaıdyń egis kólemi shamamen 900 myń gektarǵa qysqarǵanymen, óndiris kólemi azaımaı, kerisinshe artty. Bul ozyq agrotehnologııalardyń tıimdiligin taǵy da dáleldeıdi, - dedi ol.
Mınıstrdiń sózinshe, bıyl dıqandar 4 mln tonnaǵa jýyq arpa jınaǵan. Al burshaq daqyldarynyń túsimi alǵash ret 1 mln tonnaǵa jetip otyr.
- Maıly daqyldar boıynsha búgingi kúnniń ózinde rekordtyq 4,3 mln tonna jınaldy jáne egin jınaý jumystary jalǵasyp jatyr. Sonymen qatar 2,9 mln tonna kartop, 3,8 mln tonna kókónis, 2,6 mln tonna baqsha daqyldary jınaldy. Maqta jınaý jumystary aıaqtaldy. Tamshylatyp sýarýdy qoldaný arqasynda keıbir sharýashylyqtar gektarynan 50 tsentnerge deıin ónim aldy. Jalpy alǵanda, ortasha ónimdilik 30 ts/ga deńgeıinde qalyptasyp, 428 myń tonna shıtti maqta jınaldy – bul ótken jylmen salystyrǵanda 42% kóp. Osyǵan baılanysty ákimdikterge maqta ósirýdiń dástúrli tásilderinen ozyq jáne tıimdi tehnologııalarǵa kóshý boıynsha jumysty kúsheıtý qajet, - dedi Aıdarbek Saparov.
Aıta keteıik, Úkimet búgin egin jınaý naýqanyn qorytyndylap, sporttyq ınfraqurylymdy damytý máselesin pysyqtap jatyr.