Qazaqstan bıe súti arqyly mıllıard dollar taba alady - A. Mamytbekov
«Ótken jyly Qaraǵandy oblysynda bıe sútinen qurǵaq kontsentrat óndiretin zaýyt ashyldy. Bul - ZollMann Stutenmilch GmbH nemis kompanııasynyń tabıǵı bıe sútiniń bıologııalyq qundylyǵy men paıdaly qasıetterin saqtaı otyra pasterleý jáne keptirý boıynsha ınnovatsııalyq tehnologııasy.
Jobada sútti óńdeý ǵana emes, ony óndirýmen de aınalysý qarastyrylǵan. Jylqylar satyp alynyp, saýyn qurylǵylary ornatyldy. Qazir zaýyt ónim shyǵara bastady.
Bul - adam aǵzasy úshin óte paıdaly ónim. Emdik qasıeti bar (ımmýnıtetti kóteredi, asqazan-ishek, baýyr jáne t.b dertterdi emdeıdi). Balalarǵa da, eresekterge de qoldanýǵa bolady. Jobany júzege asyrý bastamasyn kóterýshi retinde "SAUMED" (qazaqsha jańa saýǵan bıe súti - SAÝMAL) saýdalyq belgisi tirkeldi.
Ónim eksporttyq saýdada suranysqa ıe. Sondyqtan bolashaqta iri eksporttyq taýarlardyń birine jáne elimizdiń ulttyq brendine aınalýy múmkin.
Búginde elimizde jylqy basynyń sany 2 mıllıonǵa jetti. Ary qaraı ósý múmkindigi de bar.
100 myń bıeniń qaıta óńdelgen súti 1 mlrd dollardyń ónimin bere alady (ortasha saýymy 500 lıtr, kontsentrat shyǵymy 1/10 , baǵasy 200 $/ kg). Osylaısha, ulttyq sýsyn qazirgi jaǵdaıda mańyzdy bolyp tabylatyn iri valıýtalyq túsim kózine aınalýy múmkin»,- dep jazady mınıstr.
