Qazaqstan bıdaıy Pákistan men Iranǵa eksporttalýy múmkin

ASTANA. QazAqparat – Premer-Mınıstrdiń olrynbasary - Saýda jáne ıntegratsııa mınıstri Serik Jumanǵarın Úkimet kýlýarynda jýrnalısterge bıdaı eksportynyń aıasyn keńeıtý sharalary týraly málimet berdi, dep habarlaıdy QazAqparat tilshisi.

«Ózderińiz bilesizder, bizde buǵan deıin astyq eksportyna tyıym salyndy. Biraq, biz fermerlerge paıda tabýǵa múmkindik berý úshin ony alyp tastadyq. Qatelespesem, 10 qyrkúıekten bastap alyndy. Qazirgi tańda bizde astyq jetkilikti. Onyń ústine, Azyq-túlik korporatsııasy da satyp aldy. Sol sebepti, bıdaıǵa qatysty eshqandaı qaýip joq», - degen mınıstr bıdaıdy eksporttaıtyn elder tizimi keńeıýi múmkin ekenin aıtty.

«Samarqanda bolǵan kezde Prezıdent Pákistan jáne Iran basshylarymen kezdesý ótkizip, naqty tapsyrmalar berdi. Keshe osy eki elmen jınalysqa daıyndyq jasadyq. Kelesi aptada sóılesemiz. Ol kezde astyq jetkizý ǵana emes, kólik logıstıkasyn keńeıtý, saýda-ekonomıkalyq yntymaqtastyǵy boıynsha úkimetaralyq komıssııanyń jumysyn ońtaılandyrý sııaqty keshendi máseleler talqylanady», - dedi Serik Jumanǵarın.

Eske salsaq, 8 shildeden bastap Qazaqstannan bıdaı men bıdaı unyn syrtqa áketýge shekteýler engizilgen bolatyn. Aýyl sharýashylyǵy mınıstrligi 14 qyrkúıekten bastap bıdaı pen un eksportyna shekteýlerdi alyp tastady .