Qazaqstan bıdaıy Vetnamǵa eksporttaldy
ASTANA. KAZINFORM — Joǵary sapaly qazaqstandyq bıdaı tıelgen tranzıttik konteınerlik poıyz Qytaıdyń Lıanıýngan portyna jetti. Bul — Vetnamǵa arnalǵan jáne «Azyq-túlik kelisimshart korporatsııasy» jibergen segiz quramnyń alǵashqysy. Jetkizý mýltımodaldy baǵyt boıynsha júzege asyrylyp otyr.
Temirjol quramy jalpy salmaǵy 1,7 myń tonna bolatyn 62 konteınerden quralǵan. Konteınerler teńiz kemelerine qaıta tıelgennen keıin, bıdaı Vetnamnyń Haıfon portyna jetkiziledi.
Qazaqstandyq astyqtyń Vetnamǵa sátti jóneltilgeni týraly Qytaıdyń ortalyq telearnasynda jáne Qytaı halyqaralyq telejelisinde arnaıy sıýjetter kórsetildi.
Qytaılyq BAQ atap ótkendeı, Lıanıýngan portyndaǵy logıstıkalyq baza «bir konteıner — bir servıs» qaǵıdasymen jumys isteıdi. Bul model boıynsha júktiń bastapqy núkteden sońǵy mejege deıin qaıta tıeýsiz bir konteınerde jetkizilýi qamtamasyz etiledi. Osy tehnologııanyń arqasynda temirjoldan teńiz portyna ótý ýaqyty nebári bir saǵatqa sozyldy. Sonymen qatar, qazaqstandyq bıdaı barlyq rásimder jedel túrde júrgiziletin «jasyl dáliz» arqyly jetkizildi.
— «Bastapqy núkteden sońǵy mejege deıin bir konteınerde jetkizý» formaty Ońtústik-Shyǵys Azııaǵa baǵyttalǵan qazaqstandyq eksportqa sapaly ári tıimdi qurlyqtyq-teńizdik ıntermodaldy qyzmet kórsetýdi qamtamasyz etti. Budan bólek, bizdiń logıstıkalyq bazamyz keden, port, temirjol jáne basqa da vedomstvolardyń qoldaýyna ıe boldy. Sonyń nátıjesinde porttaǵy júktiń rásimdelý tıimdiligi 70%-ǵa artty, — dep keltiredi BAQ Lıanıýngan qalasyndaǵy Qytaı-Qazaqstan logıstıkalyq yntymaqtastyq bazasynyń bas dırektory Ge Hensıýeniń sózin.
Aıta keteıik, alǵashqy bıdaı partııasy Aqmola oblysyndaǵy astyq qabyldaý kásiporyndarynda daıyndalǵan. Jalpy, Vetnamǵa shamamen 15 myń tonna azyqtyq bıdaı jóneltiledi dep josparlanyp otyr.
«Azyq-túlik kelisimshart korporatsııasy» UK» AQ basqarma tóraǵasy Asylhan Júnishevtiń aıtýynsha, jańa logıstıkalyq baǵyttar qazaqstandyq agrarshylar úshin alys shetel naryqtaryna shyǵýǵa jol ashyp otyr.
— Qytaılyq áriptestermen birlesip qurylǵan ınfraqurylym búginde naqty nátıjesin kórsetip otyr, bul turaqty jáne jedel jetkizilim. Bul elimizdiń eksporttyq áleýetin damytýdaǵy mańyzdy qadam, — dedi korporatsııa basshysy.
Jyl basynan beri «Azyq-túlik kelisimshart korporatsııasy» eksportqa 196 myń tonna astyq jóneltti. Eń iri partııalar Soltústik Afrıka, Ońtústik-Shyǵys Azııa jáne Iran naryqtaryna jiberildi.
Aıta ketelik 36 qazaqstandyq kásiporyn Eýropaǵa organıkalyq ónim eksporttap otyrǵany týraly jazǵan edik.