Qazaqstan bıdaı ımportyna tyıym salmaq
ASTANA.KAZINFORM — Aýyl sharýashylyǵy mınıstrligi Qazaqstan aýmaǵyna avtomobıl, sý jáne temirjol kóligi arqyly bıdaı ımportyn ýaqytsha shekteýdi kózdeıtin buıryq jobasyn qoǵamdyq talqylaýǵa shyǵardy. Mınıstrlik qujatqa qatysty usynystar men eskertýlerdi qabyldaýǵa daıyn.
— Úshinshi elderden jáne Eýrazııalyq ekonomıkalyq odaq elderinen Qazaqstan Respýblıkasynyń aýmaǵyna qus sharýashylyǵy jáne astyq óńdeý kásiporyndarynyń, lıtsenzııalanǵan elevatorlardyń, «Azyq-túlik kelisimshart korporatsııasy» ulttyq kompanııasy» aktsıonerlik qoǵamynyń mekenjaıyna temirjol kóligimen bıdaı ákelýdi qospaǵanda, avtomobıl, sý jáne temirjol kóligimen bıdaıdy (Eýrazııalyq ekonomıkalyq odaqtyń syrtqy ekonomıkalyq qyzmetiniń taýar nomenklatýrasynyń kody: 1001) ákelýge alty aı merzimge tyıym salý engizilsin, — delingen qujatta.
Erejege saı qus sharýashylyǵy jáne astyq óńdeý kásiporyndarynyń mekenjaıyna ákelingen bıdaı ishki jáne syrtqy naryqtarda ótkizilmeýi (satylmaýy) tıis ekeni aıtylǵan.
— Tyıym salý Qazaqstan Respýblıkasynyń aýmaǵyna temirjol tranzıttik tasymaldary sheńberinde ákelinetin bıdaıǵa, sondaı-aq olardyń Qazaqstan Respýblıkasynyń aýmaǵy arqyly Eýrazııalyq ekonomıkalyq odaqqa múshe bir memlekettiń aýmaǵynan Eýrazııalyq ekonomıkalyq odaqqa múshe basqa memlekettiń aýmaǵyna ornyn aýystyrýǵa qoldanylmaıdy, — delingen habarlamada.
Buǵan deıin agroónerkásip kesheninde astyq ótkizý shyǵyndaryn óteý tártibi ózgeretinin jazdyq.
