Qazaqstan bıdaı eksportyn 1 mln. tonnaǵa arttyrmaq
ASTANA. QazAqparat - QR Parlamenti Senatynyń Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Islam Konferentsııasy Uıymyna múshe elder arasyndaǵy ekonomıkalyq, tehnıkalyq jáne saýda yntymaqtastyǵy týraly bas kelisimdi ratıfıkatsııalaý týraly» zań jobasy talqylandy, dep habarlaıdy QazAqparat.
QR Ulttyq ekonomıka vıtse-mınıstri Ernar Bákenov atalǵan zań jobasyn tanystyrý barysynda bul kelisimdi ratıfıkatsııalaý IYU elderimen saýda-ekonomıkalyq yntymaqtastyqty keńeıtýge múmkindik beretinin atap ótti.
«Islam yntymaqtastyǵy uıymy qatysýshylarynyń sany, geografııalyq aýqymy men mamandandyrylǵan qurylymdar jelisi jaǵynan Birikken ulttar uıymynan keıingi 56 memleketti biriktiretin iri halyqaralyq uıym. Sońǵy bes jylda Qazaqstannyń jalpy taýar aınalymyndaǵy IYU-ǵa múshe eldermen saýda kóleminiń úlesi ilgerilemeli túrde ósip keledi»,-dedi Ernar Bákenov.
Atap aıtqanda, eger de 2012 jyly saýda kóleminiń úlesi 7,2 paıyz bolsa, 2016 jylǵy qańtar-qazanda IYU elderiniń úlesi 10,3 paıyzdy qurady.
Vıtse-mınıstrdiń sózine qaraǵanda, elimizdiń eksporty qurylymynyń negizi bóligin aýyl sharýashylyǵy ónimderi qurap otyr.
«Jalpy, aýyl sharýashylyǵy ónimderi eksportyn arttyrýǵa nıettimiz. Búgin qarastyrylǵan kelisim bul baǵytta saýdany keńeıtýge jol ashady jáne atalǵan elderge astyq eksportyn taǵy 1 mıllıon tonnaǵa attyrýǵa múmkindik beredi»,-dedi Bákenov.
Taratylǵan málimetterge qaraǵanda, qazirgi kezde Qazaqstannyń IYU elderimen taýar aınalymy 6,3 mlrd. AQSh dollaryna jetken.
«Búginde IYU elderine 1,5 mıllıon tonnaǵa jýyq bıdaı eksporttap jatyrmyz»,-dedi ol.
Osy oraıda ol qazirgi kezde bıdaıdy tasymaldaý boıynsha naqty ýaǵdalastyqtar joq ekenin, alaıda saýda-sattyqty kedergisiz jasaý úshin quqyqtyq bazany qamtamasyz etý boıynsha kelissózder júrgizilip jatqandyǵyn atap ótti.
