Qazaqstan bıdaı eksporty boıynsha Aýǵanstan naryǵyn jalǵyz ózi jaýyp otyr -QR SІM

ASTANA. QazAqparat - Qazaqstan Aýǵanstanǵa bıdaı eksporttap qana qoımaı, basqa da taýar túrlerin ótkizý boıynsha jumys júrgizedi. Bul týraly Memleket basshysy Nursultan Nazarbaevtyń AQSh-qa jasaǵan resmı saparynyń qorytyndysy boıynsha Astanada baspasóz máslıhatyn ótkizgen QR Syrtqy ister vıtse-mınıstri Erjan Ashyqbaev málim etti, dep habarlaıdy «QazAqparat» HAA tilshisi.

«Aýǵanstanǵa logıstıkalyq qoldaý kórsetý jónindegi kelisimderge keler bolsaq. Temirjol men áýe tranzıti týraly aıttyq. Bul máseleler Qazaqstan Respýblıkasy tarapynan birneshe jyldan beri kóterilgen. Biz ózimizge júktelgen mindettemelerdiń barlyǵyn tolyqtaı oryndap otyrmyz. Endigi kezekte, Qazaqstannyń bıznes ókilderin Aýǵanstandaǵy ekonomıkalyq jobalarǵa qatystyrýǵa múddelimiz. Bul jaıynda da AQSh-ta áriptesterimizben másele kótergen edik. Qazaqstan taýarlarynyń aýǵan naryǵyna kirý máselesi de bizdiń nazarymyzda. Sońǵy 2016-2017 jyldardy aıtar bolsaq, Qazaqstan bıdaı eksporty boıynsha Aýǵanstan naryǵyn jalǵyz ózi jaýyp otyr desek te bolady. Sondyqtan, áli de basqa taýarlar boıynsha áleýetimiz bar. Sol áleýetterdi iske asyrýǵa barynsha kúsh salamyz», - deıdi Erjan Ashyqbaev.

Eske sala ketsek, 20 qańtarda BUU Qaýipsizdik Keńesinde Qazaqstannyń tóraǵalyq etýimen «Aýǵanstan men Ortalyq Azııadaǵy aımaqtyq seriktestikti qaýipsizdik pen damýdyń ózara táýeldilik úlgisinde qurý» taqyrybynda mınıstrlik deńgeıinde debattar ótkizilgen bolatyn. Qazaqstannyń Syrtqy ister mınıstri Qaırat Ábdirahmanov atalǵan jıynda sóz sóılep, Qazaqstannyń BUU QK-de óz jumysyn bastaýyna baılanysty Prezıdent Nursultan Nazarbaev «Gúldengen, ádil ári qaýipsiz álem qurý úshin jahandyq yntymaqtastyqty bekemdeýdiń kontseptýaldy kózqarasy» atty óziniń úndeýinde jeti basymdyqty erekshe bólip kórsetkenin atap ótti.

Atalǵan jeti basymdyqtyń biri - Ortalyq Azııa men Aýǵanstandy beıbitshiliktiń, yntymaqtastyq pen qaýipsizdiktiń modeline aınaldyrý bolyp tabylady. Qaýipsizdik Keńesindegi bizdiń eldiń turaqty emes músheligi kezinde atalyp ótken basymdyqtardyń taǵy biri retinde Memleket basshysy ózara táýeldilik jáne damý modeli turǵysynda uzaq merzimdi turaqtylyq pen myǵym beıbitshilikke den qoıdy.