Qazaqstan Beıjińdegi THKB jónindegi aýqymdy kezdesýge qatysty
ASTANA. KAZINFORM – Búgin Beıjińde Qazaqstan delegatsııasynyń qatysýymen Transkaspıı halyqaralyq kólik baǵytyna arnalǵan aýqymdy kezdesý men turaqty kólik máselelerine qatysty jahandyq forým ótti. Bul týraly Kazinform agenttiginiń Beıjińdegi menshikti tilshisi habarlaıdy.
Atalǵan jıyndardyń ashylýynda QR Premer-mınıstriniń birinshi orynbasary Nurlybek Nálibaev, Búkilqytaı halyq ókilderi jınalysynyń 14-shaqyrylymy Turaqty komıteti tóraǵasynyń orynbasary Shohrat Zakır,
sondaı-aq Ázirbaıjan men Qyrǵyzstan ókilderi sóz sóıledi.
Nurlybek Nálibaev Qazaqstan Prezıdenti Qasym-Jomart Kemeluly Toqaev eldiń tranzıttik-logıstıkalyq áleýetin arttyrýdy negizgi baǵyttardyń biri retinde aıqyndaǵanyn atap ótti.
– Bizdiń maqsatymyz – Qazaqstandy Eýrazııadaǵy kólik-logıstıka habyna aınaldyrý. Osy strategııalyq maqsatqa jetý úshin «Shyǵys – Batys» jáne «Soltústik – Ońtústik» baǵyttaryndaǵy dálizderdi, Transkaspıı halyqaralyq kólik baǵytyn kezeń-kezeńimen damytyp kelemiz. Sonymen qatar shekara jáne port ınfraqurylymyn jańǵyrtyp, zamanaýı mýltımodaldy tasymal qyzmetterin qalyptastyryp jatyrmyz, – dedi ol.
Qazaqstan delegatsııasynyń basshysy Transkaspıı halyqaralyq kólik baǵytyna (THKB) arnaıy toqtalyp, bul dálizdi damytý Qazaqstannyń kólik saıasatyndaǵy basty basymdyqtardyń biri ekenin aıtty. Onyń sózinshe, atalǵan baǵyttyń damýy Qazaqstannyń Eýrazııadaǵy kólik baılanysyn nyǵaıtýǵa qosqan naqty úlesi sanalady.
– Bizdiń ortaq mindetimiz – bul baǵytty qaýipsiz ári tıimdi kólik dálizine aınaldyrý. Ol úshin tasymal merzimi turaqty, tarıfter básekege qabiletti, al qyzmet kórsetý talaptary barlyq jerde birizdi bolýy qajet, – dedi QR Premer-Mınıstriniń birinshi orynbasary.
Qytaı tarapynyń ókili Shohrat Zakır Qytaıdyń Transkaspıı halyqaralyq kólik baǵytyn damytýǵa aıryqsha mán beretinin atap ótti. Onyń aıtýynsha, Qytaı barlyq seriktesimen birlesip, osy baǵyt arqyly tasymal kólemin arttyrýǵa, tıimdiligin kóterýge jáne ony Eýrazııadaǵy kólik baılanysynyń ozyq úlgisine aınaldyrýǵa daıyn.
Onyń aıtýynsha, elder kólik baǵyty boıynsha turaqty ári kópjaqty konsýltatsııalyq tetik qurýy qajet. Infraqurylymdyq baılanysty nyǵaıtyp, tasymal múmkindigin keńeıtý, shekaraaralyq tasymal erejeleri men keden talaptaryn birizdendirý de mańyzdy. Sonymen qatar mýltımodaldy tasymalǵa arnalǵan tsıfrlyq platforma qalyptastyryp, port mańyndaǵy óndiristi damytý, jetkizý tizbegin qarjylandyrý tetikterin jetildirý jáne bıznestiń ózge de baǵyttaryn jolǵa qoıý qajet.
Marshrýttyń negizgi ýchaskelerindegi jumysty úılestirýdiń mańyzyn ÁzІrbaıjan tarapy da qoldady. Eldiń vıtse-premeri Shahın Mustafaevtyń aıtýynsha, «Orta dálizdiń» tıimdi jumys isteýi úshin baǵyt boıyndaǵy memleketterdiń kúsh-jigerin úılestirip, ınfraqurylymdy bir mezgilde damytý qajet. Bul rette «tar tustardy» joıyp, rásimderdi jeńildetý jáne tsıfrlyq sheshimderdi engizý de mańyzdy.
– Ázirbaıjan barlyq seriktespen yntymaqtastyq ornatýǵa daıyn. Ortaq kúsh-jigerdiń arqasynda «Orta dáliz» Azııa men Eýropany jalǵaıtyn senimdi, tıimdi ári turaqty kólik kópirine aınalady dep senemiz, – dedi ol sózin qorytyndylap.
Óz kezeginde Qyrǵyz Respýblıkasy Mınıstrler kabıneti tóraǵasynyń orynbasary Erlıst Akýnbekov teńizge tikeleı shyǵa almaıtyn memleketterdiń kólik salasyndaǵy máselelerine toqtaldy. Ol Qyrǵyzstannyń óńirlik kólik jelisin damytýǵa belsendi atsalysyp, qurlyqtyń qaq ortasynda ornalasqan elder úshin tasymal kedergilerin azaıtýǵa daıyn ekenin jetkizdi. Bul Ortalyq Azııa taýarlarynyń álemdik naryqqa erkin shyǵýyna jol ashpaq.
Buǵan deıin Transkaspıı baǵyty boıynsha tasymal kólemi 5,6 esege óskeni habarlanǵan bolatyn.
