Qazaqstan Beıjińdegi Sıanshan qaýipsizdik forýmyna qatysyp jatyr
ASTANA. KAZINFORM — Seısenbi kúni Qytaı astanasynda 100-ge jýyq el, óńir men halyqaralyq uıymnyń ókilderi qatysatyn XIII Sıanshan qaýipsizdik forýmy jumysyn bastady, dep habarlaıdy Kazinform agenttiginiń Beıjińdegi menshikti tilshisi.
QHR Qorǵanys mınıstrliginiń resmı ókili Tszıan Bınniń aıtýynsha, úsh kúndik forýmǵa qorǵanys mınıstrleri men bas shtab bastyqtary dárejesindegi 60-tan astam ókil qatysyp otyr.
Qazaqstan Respýblıkasy Qorǵanys mınıstriniń orynbasary Asqar Mustabekov Qytaı Halyq Respýblıkasynyń astanasy Beıjińde ótip jatqan halyqaralyq qaýipsizdik sharasyna keldi.
Bıyl forým «Turaqtylyq máseleleri boıynsha ortaq ustanymdy nyǵaıtyp, qaýipsizdik salasyndaǵy basqarýdy birlesip damytý» taqyrybymen ótip jatyr. Baǵdarlamada tórt plenarlyq otyrys, segiz parallel sessııa jáne jabyq semınarlar qarastyrylǵan.
Ár elden jınalǵan sarapshylar forýmnyń alǵashqy kúninde álemdik tártiptiń kóppolıarly sıpatyn qalyptastyrý, jahandyq basqarý júıesin jańǵyrtý, óńirlik qaqtyǵystardy retteý jáne kópjaqty yntymaqtastyqty nyǵaıtý máselelerin talqylady. Sondaı-aq jasandy ıntellekt salasyndaǵy halyqaralyq qaýipsizdik máselesine nazar aýdaryldy.
Aıta keteıik, bıyl Sıanshan forýmynyń qurylǵanyna 20 jyl tolyp otyr. 2006 jyly negizi qalanǵan forým sodan beri qaýipsizdik pen qorǵanys máselelerin talqylaıtyn jahandyq dıalogtyń mańyzdy alańyna aınaldy.
Buǵan deıin Qytaıdyń 2026 jyly qorǵanys shyǵyndaryn 7%-ǵa arttyratyny habarlanǵan bolatyn.
Aqzat Jıenalına
