Qazaqstan Beıjiń forýmynda kitaphana tájirıbesimen bólisti
ASTANA. KAZINFORM — Qytaı astanasy — Beıjińde «Mádenıet pen tehnologııanyń keshendi damýy» taqyrybynda Beıjiń mádenıet forýmy ótti. Bul týraly QR Mádenıet jáne aqparat mınıstrligi habarlady.
Іs-shara aıasynda plenarlyq otyrys, alty parallel forým jáne 20-dan astam taqyryptyq sessııa men pikirtalas alańy uıymdastyryldy.
Qatysýshylar mádenı murany tsıfrlandyrý, ǵylym men tehnologııanyń mádenı kreatıvtilikke qosatyn úlesi, aýdıovızýaldy ındýstrııany ıntegratsııalaý, jańa tehnologııalar arqyly qoǵamdyq mádenıettiń sapasyn arttyrý, jelilik mádenıetti ınnovatsııalyq damytý jáne órkenıettik alýan túrlilikti saqtaý máselelerin talqylady.
Qazaqstan atynan Mádenıet jáne aqparat mınıstrligi Arhıv, qujattama jáne kitap isi komıtetiniń tóraǵasy Rýstam Álı qatysyp, kitaphana júıesine jasandy ıntellekt engizý jónindegi ulttyq strategııa týraly baıandama jasady. Uzaq merzimge baǵyttalǵan baıandama sheteldik mamandar tarapynan joǵary baǵalandy.
Sondaı-aq Jańa Zelandııa, Pekın ýnıversıteti, Shanhaı, Sıngapýr jáne basqa óńirlerden kelgen jetekshi mamandar zamanaýı tehnologııalar men mádenıet salasynyń toǵysyndaǵy múmkindikterdi saralady.
Forým «Jasandy ıntellekt jaǵdaıynda kitaphanalardyń múmkindikteri men syn-qaterleri» atty arnaıy sessııamen qorytyndylandy. Jıynǵa álemniń jetekshi kitaphana dırektorlary, belgili ǵalymdar men tehnologııa salasynyń jańashyl mamandary qatysyp, jasandy ıntellekttiń qoǵamdyq mádenı mekemelerge tıgizetin yqpaly men bolashaǵyn talqylady.
Eske salaıyq, buǵan deıin Ulttyq kitaphana jańa sırek qoljazbamen tolyqqany týraly jazǵan bolatynbyz.