Qazaqstan Beıjińdegi ShYU Syrtqy ister mınıstrleri keńesiniń otyrysyna qatysty

ASTANA. QazAqparat - Shanhaı yntymaqtastyq uıymyna múshe memleketterdiń syrtqy ister mınıstrleri maýsym aıynda Tsındao qalasynda ótetin  ShYU sammıtiniń kún tártibin talqylady, dep habarlaıdy QazAqparat tilshisi QR Syrtqy ister mınıstrliginiń baspasóz qyzmetine silteme jasap.

«Beıjińde ótken kezdesýde Úndistan, Qazaqstan, Qytaı, Qyrǵyzstan, Pákistan, Reseı, Tájikstan jáne Ózbekstan syrtqy ister mınıstrleri ShYU saıası, ekonomıkalyq jáne gýmanıtarlyq salalardaǵy bolashaq qyzmeti mindetterin, Tsındao deklaratsııasynyń jobalaryn jáne uıymnyń aǵymdaǵy qyzmeti týraly birqatar sheshimderdi qarastyrdy», - dep habarlady mınıstrlik.

Sonymen birge, otyrys qatysýshylary halyqaralyq jáne aımaqtyq kún tártibindegi ózekti máseleler boıynsha pikir almasyp, 2017 jyldyń maýsym aıynda Astanada ótken ShYU sammıtinde qol jetkizilgen ýaǵdalastyqtardy iske asyrý barysyn qarady.

QR Syrtqy ister mınıstri Qaırat Ábdirahmanov ShYU-ǵa múshe elderdiń kóliktik marshrýttarynyń aýqymdy júıesin eskere otyryp, azyq-túlik qaýipsizdigin qamtamasyz etý, avtomobıl joldary men temirjoldardy damytý máselesiniń ózekti ekenin atap ótti.

Sondaı-aq, ol Qazaqstannyń ShYU Іskerlik keńesi men ShYU Bankaralyq birlestiginiń mınıstrlik kezdesýler men jumys toptarynyń keńeıtilgen yntymaqtastyǵyna qosylýyn qoldaıtynyn jetkizdi jáne

saýda-ekonomıkalyq salada qabyldanǵan qujattardy túgendeýdi júrgizýdi, olardy odan ári iske asyrýdy usyndy.

Kezdesý qarsańynda delegatsııalar basshylary Qytaı Halyq Respýblıkasynyń Tóraǵasy Sı Tszınpınmen kezdesti. Onda qytaılyq taraptyń ShYU-ny damytýdy eldiń syrtqy saıasatynyń basymdyqtarynyń biri retinde qaraıtynyn jáne basqa memlekettermen birlese otyryp, saıası salada ózara qoldaý kórsetýge, aımaqtaǵy turaqtylyqqa, «beldeý jáne joldar» baǵdarlamasy aıasynda yntymaqtastyqty tereńdetý men gýmanıtarlyq almasýǵa daıyn ekeni aıtyldy.