Qazaqstan beıbitshilik pen qaýipsizdikti nyǵaıtýdaǵy úlesin údete beredi - Prezıdent

ASTANA. KAZINFORM — Qazaqstan Ortalyq Azııany beıbitshiliktiń, ortalyǵy bolýyn únemi ilgeriletip keledi. Bul týraly elordadaǵy Táýelsizdik saraıynda «Ortalyq Azııa – Qytaı» ІІ sammıtinde Memleket basshysy Qasym-Jomart Toqaev málim etti.

- Qazaqstan Eýrazııanyń qaq ortasynda ornalasqan Ortalyq Azııany beıbitshiliktiń, turaqty qaýipsizdiktiń jáne nátıjeli ózara is-qımyldyń oshaǵy bolýyn únemi ilgeriletip keledi. Biz beıbitshilik pen qaýipsizdikti nyǵaıtýǵa, dinı ekstremızmge, lańkestikke, separatızmge, esirtki tasymalyna, zańsyz qarý-jaraq saýdasyna, zańsyz kóshi-qonǵa jáne adam saýdasyna qarsy tabandy túrde kúresýge úlesimizdi qosa bermekpiz, - dedi Qasym-Jomart Toqaev.

Sonymen qatar Prezıdent halyqaralyq kıberqylmystyń taralýy problemasy óńirdegi elderdiń erekshe nazar aýdarýyn talap etetinin atap ótti.

- Biz kıberqaýipsizdik máselelerine jaýapty vedomstvo basshylary arasynda turaqty baılanys ornatýdy usynamyz, - dedi Memleket basshysy.

Budan buryn habarlanǵandaı, Astanada «Ortalyq Azııa – Qytaı» ІІ sammıti jumysyn bastady.