Qazaqstan Beıbitshilik keńesine kirý úshin 1 mlrd dollar jarna tólemeıdi
ASTANA. KAZINFORM - Qazaqstan Beıbitshilik keńesine kirý úshin 1 mlrd dollar jarna tólemeıdi. Bul týraly Aqordanyń baspasóz qyzmetinen málim etti.
Aqordanyń málimetinshe, Beıbitshilik keńesine qatysý memleketterdiń derbes sheshimine negizdeledi. Memleketter Keńes quramyna engennen bastap úsh jyl múshe bola alady.
- Jarǵyda aıtylǵan 1 mıllıard dollar kólemindegi erikti jarna músheliktiń sharty bolyp sanalmaıdy. Eger alǵashqy jylda mundaı jarna tólengen bolsa, memleket Keńes quramyndaǵy merzimin úsh jyldan ári uzarta alady. Qazaqstan Beıbitshilik keńesine kirýge qandaı da bir qarjy tólegen joq. Bul Jarǵy erejelerine tolyq saı keledi, - dep túsindirdi Aqordadan.
Aıta keteıik, keshe, 22 qańtar kúni Memleket basshysy Qasym-Jomart Toqaev AQSh Prezıdenti Donald Tramptyń bastamasymen qurylǵan Beıbitshilik keńesiniń Jarǵysyna qol qoıdy.