Qazaqstan beıbitshilik pen kelisimniń úlgisi – EQYU Joǵary komıssary
Onyń aıtýynsha, búgingi shara din kóshbasshylarynyń dıalogty jandandyrýǵa, beıbitshilik ornatýǵa jáne tózimdilik pen ózara túsinistikke yqpal etýge umtylysyn kórsetedi.
Óz sózinde EQYU-nyń az ulttar isteri jónindegi Joǵarǵy komıssary 10 jyl buryn Qazaqstan astanasynda ótken EQYU sammıtinde «Astana» deklaratsııasy qabyldanǵanyn eske saldy. Qazirgi ýaqytta bul jalpyǵa birdeı daýys berý arqyly qabyldanǵan jalǵyz deklaratsııa.
«Astana deklaratsııasynda EQYU-ǵa qatysýshy elder ortaq qundylyqtar negizinde eýroatlantıkalyq aımaqta bólinbeıtin qaýipsizdik qaýymdastyǵyn qurýǵa nıet bildirdi. Sonymen birge deklaratsııa dıskrımınatsııamen jáne tózbeýshilikpen kúresý úshin qosymsha kúsh salý qajet ekenin atap ótti. Deklaratsııada beıbitshilik maqsatymen dıalogty qoldaý úshin bárin jasaý kerektigi aıtylǵan», - dedi Qaırat Ábdirahmanov.
Spıkerdiń aıtýynsha, tózimdilik – qaqtyǵystardy sheshýdiń jáne ádiletti qoǵam qurýdyń kilti bolyp sanalady.
«Ózimiz kýá bolǵandaı, pandemııa kezinde jańa shıelenister paıda boldy jáne oqshaýlaný kezinde dıalog keńistigi azaıǵanyn túsinip, moıyndaýymyz kerek. Sondyqtan da, pandemııadan keıingi kezeńde álem men adamzattyń saıası-áleýmettik damýyndaǵy dinderdiń, dinı kóshbasshylardyń mańyzdylyǵyn nazarǵa alyp, birlese jumys isteıtin ýaqyt jetti. Biz jańa kún tártibin qurýǵa tıispiz», - dedi Qaırat Ábdirahmanov.
Sonymen birge, Q. Ábdirahmanov 1992 jyly EQYU-nyń Az ulttar isteri jónindegi Joǵarǵy komıssar ınstıtýty qurylǵanyn atap ótti.
«Qazaqstan – Ortalyq Azııadaǵy jáne odan tys jerlerdegi tózimdiliktiń, beıbitshilik pen kelisimniń úlgisi. Qazaqstan halqy kópultty jáne kópkonfessııaly el qurý úshin óte mańyzdy ról atqarady. Qazirgi ýaqytta biz alýantúrlilikti birlikke jetýdiń quraly retinde qarastyramyz. Dinı jáne, ásirese áleýmettik birlikke qol jetkizý úshin memleket pen Úkimet kóptegen baǵyttar boıynsha barynsha batyl sharalar qabyldaýǵa tıis», - dedi Qaırat Ábdirahmanov.
