Qazaqstan bes mıllıon qytaıdy qabyldaı ma?
ASTANA. 24 sáýir. QazAqparat - Reseı ekonomıka joǵary mektebindegi Ulttyq zertteý ýnıversıtetiniń professory Alekseı Maslovtyń boljamynsha, taıaý jyldarda Ortalyq Azııa elderinde 8 mln. qytaılyq ómir súretin bolady.
Bul týraly «Aıqyn» gazeti seısenbi, 24 sáýir kúni shyqqan sanynda jazdy.
Shyǵystanýshy ǵalymnyń pikirinshe, Qytaıdyń qazirgi áreketi Ortalyq Azııany óziniń ekonomıkalyq múddesine qaraı beıimdeýge baǵyttalǵan. Óıtkeni Qytaı Halyq Respýbıkasy úshin kapıtalyn eksporttaý jáne energoresýrs naryǵyna shyǵý qazirgi kezde óte qajet.
«Bul jerde Qytaı saıasatynyń soltústik-batys vektory bar. Ol mynaǵan baılanysty: Qazaqstanǵa tireletin Shyńjań-Uıǵyr avtonomııalyq aýdanynda qytaılyqtardyń sany sońǵy jyldarda kúrt ósti. Búgingi kúni ol 30 mln. adamdy quraıdy. Osynyń ózi az emes, endi biraz ýaqytta 100 mln. adamǵa deıin ósedi. Al onyń sońy lyqyldap tolǵannan keıin «syrtqa tógilýge» ákelip soǵady», - dep málimdedi Ulttyq zertteý ýnıversıteti shyǵystaný bóliminiń meńgerýshisi, professor Alekseı Maslov Táýekel-menedjment boıynsha ótken 8-inshi halyqaralyq konferentsııada.
Ǵalymnyń boljamynsha, Shyńjań-Uıǵyr aýdanynan shyqqan 8 mln. qytaı taıaý jyldarda Ortalyq Azııaǵa kelip qonystanýy múmkin eken. «Osy 8 mln. qytaıdyń qansha paıyzy Qazaqstanǵa kelýi múmkin?» degen suraqqa Alekseı Maslov: «Shamamen 2/3-i», - dep jaýap berdi. Sonda Qazaqstan bes mıllıon qytaıdy qabyldaýy kerek pe?
