Qazaqstan benzıni Qyrǵyzstanǵa kontrabandalyq jolmen tasymaldanyp jatyr

BІShKEK. QazAqparat – 2022 jylǵy 12 shildeden bastap Qazaqstan Respýblıkasynyń aýmaǵynan avtomobıl kóligimen benzındi, dızel otynyn jáne munaı ónimderiniń jekelegen túrlerin belgilengen normadan artyq shyǵarýǵa tyıym salyndy.

Engizilgen shekteýlerge qaramastan, Qyrǵyzstanmen shekaralas aımaqta qazaqstandyq janarmaıdy kontrabandalyq jolmen saýdalaý toqtamaı tur, dep habarlaıdy QazAqparat menshikti tilshisi.

Qyrǵyz tarapynan «Qordaı» shekaralyq ótkeline irgeles eldi mekenderde jol jıeginde plastıkalyq ydysta AI–92 markaly qazaqstandyq benzındi 1 lıtr úshin 55 som baǵamen, sondaı-aq AI-95 1 lıtr úshin 58 som baǵamen satý oryndary uıymdastyrylǵan. Qyrǵyzstandaǵy janarmaı quıý beketterinde olardyń quny shamamen 60 jáne 63 somdy quraıdy.

Kontrafaktini satýshylardyń aıtýynsha, janar-jaǵarmaıdy olarǵa jergilikti jetkizýshiler de, qazaqstandyqtar da jetkizedi. Olar úshin shekara arqyly benzın tasymaldaý – bıznes jáne turaqty qosymsha tabys kózi bolyp otyr. Óıtkeni Qazaqstandaǵy otyn baǵasy aıtarlyqtaı arzan.

Kóptegen júrgizýshiler otyndy zańsyz satý maqsatynda jeke kólikterimen shekaradan janarmaı tasymaldaıdy. Olar janarmaı baktaryn kóbeıtý arqyly avtomobılderiniń tehnıkalyq sıpattamalaryna óz betinshe ózgerister engizedi. Janar-jaǵarmaı tasymaldaýshylarynyń qaýipsizdik tehnıkasyn óreskel buzýy avtokólik quraldarynyń janýyna jáne qaıǵyly saldarǵa ákelýi múmkin.