Qazaqstan benzındi el aýmaǵynan shyǵarýǵa tyıym merzimin uzartady

NUR-SULTAN. QazAqparat - Qazaqstan benzındi avtomobılmen el aýmaǵynan shyǵarýǵa tyıym ýaqytyn uzartady. Bul týraly búgin Energetıka mınıstrliginiń alqa otyrysynda vedomstvo basshysy Nurlan Noǵaev aıtty, dep habarlaıdy QazAqparat tilshisi.

Onyń aıtýynsha, 2019 jyly munaıdy óńdeý kólemi 2018 jylmen salystyrǵanda 4,4 paıyzǵa ósip, 17,2 mln tonnany qurady.

«Bul rette, 2019 jyly munaı ónimderiniń negizgi túrlerin óndirý kólemi 2018 jylǵa qaraǵanda 9,5 paıyzǵa ósti. Bıylǵy jospar 12,5 mln tonnany quraıdy. Aıta ketý kerek, josparlar munaı ónimderiniń ishki tutynýyn negizge ala otyryp eseptelgen. Eger qajettilik bolǵan jaǵdaıda, jyl boıy óńdeý kólemin ulǵaıtý úshin bizde rezerv bar», - dedi Energetıka mınıstri.

Mınıstrdiń atap ótýinshe, qazaqstandyq munaı óńdeý zaýyttaryn jańǵyrtý jumystary aıaqtalǵan soń ishki naryqtyń qajettiligi tolyǵymen ózimizdiń óndiris esebinen qamtamasyz etiledi. Bul rette 2019 jyldyń qorytyndysy boıynsha naryqtyń benzınmen, dızel otynymen jáne avıakerosınmen qamtamasyz etilýi 100 paıyzǵa jetkenin atap ótýi kerek.

«2019 jylǵy shilde aıynda tyıym salýdy alǵannan keıin benzındi Eýropaǵa jáne Ortalyq Azııaǵa eksporttaý bastaldy. Benzınniń eksport kólemi 180,7 myń tonnany qurady. Sondaı-aq, mınıstrlik janar-jaǵarmaı tapshylyǵy faktilerin boldyrmaý maqsatynda munaı ónimderin Qazaqstan Respýblıkasynyń aýmaǵynan avtomobıl kóligimen áketýge tyıym saldy. Ol ár 6 aı saıyn uzartylatyn bolady. Osyǵan baılanysty ýákiletti tulǵalarǵa buıryqtyń merzimin uzartý boıynsha qajetti sharalardy qabyldaýdy tapsyramyn», - dedi Nurlan Noǵaev.