Qazaqstan benzındi Belarýske qashan eksporttaı bastaıdy
«Belarýs Prezıdenti Aleksandr Lýkashenko osyndaı usynys jasady. Rastaımyn. Osyndaı áńgime boldy. Birinshi vıtse-premerleri kelip, tıisti ekijaqty kelissózderdi ótkizdik. Qazir jumys toby quryldy. Bul máseleni talqylap jatyrmyz. Eger kelisimge kelsek, 2-3 aıdyń ishinde múmkin Qazaqstan men Belarýstyń arasynda kelisimshart bolady», - dedi Energetıka mınıstri.
Qanat Bozymbaev sonymen qatar, Qazaqstan benzın eksportyn arttyrsa, elimizde benzın baǵasy qymbattap ketpeı me degen suraqqa da jaýap bere ketti.
«Ol bizge esh zııanyn tıgizbeıdi. Óıtkeni, ózimizdiń munaıymyzdy Frantsııaǵa Qytaıǵa, Italııaǵa jetkizip satyp otyrmyz. Belarýs nege almaıdy? Men túsinbeımin. Aramyzda bir ǵana másele bar - ol kedendik alym. Dál sondaı másele Reseı men Belarýs arasynda da bar. Sony biz durystap sheshsek, eshqanda problema bolmaıdy», - dedi mınıstr.
Eske sala ketsek, osy jyldyń mamyr aıynda Belarýs Prezıdenti Aleksandr Lýkashenko Qazaqstandy munaı boıynsha kelissózderdi jandandyrýǵa shaqyrǵan bolatyn.
«Qazirgi ýaqytta biz kómirsýtek shıkizatyn tasymaldaýdy ártaraptandyrýmen aınalysyp jatqanymyzdy biletin bolarsyzdar. Bizde birneshe nusqa bar. Belarýs basqa jerden de munaı tasymaldaý baǵytynda kelissózder júrgizý ústinde. Bıyl munaı óńdeıtin zaýyttardy jańǵyrtý jumysyn aıaqtaımyz. Sol sebepti, bizge álemdik naryqtan munaıdy satyp alý jeńildeı túsedi. Bul baǵyttaǵy kelissózderdi bastap kettik te. Endi Belarýsqa qazaqstandyq munaıdy jetkizý boıynsha kelissózder jandansa deımiz», - degen edi Aleksandr Lýkashenko.
