Qazaqstan benzın eń arzan 5 eldiń qataryna kirdi

Osy jyldyń qańtar-tamyz aılarynyń qorytyndysynda elimizde 3,4 mln tonna benzın óndirildi. Bul byltyrǵydan 5,4 paıyzǵa kóp, dep habarlaıdy Kazinform.

Energyprom.kz portalynyń málimetinshe, óńirler boıynsha Shymkent ádettegideı eń kóp benzın óndirdi: 1,3 mln tonna, alaıda bir jylda 8,2 paıyzǵa azaıǵan. Úzdik úshtikke Atyraý (1,2 mln tonna, 30,4 paıyzǵa kóbeıgen) jáne Pavlodar (980,4 myń tonna, 0,6 paıyzǵa kóbeıgen) oblystary kirdi.

Jalpy, 2022 jyly elimizde benzın óndirisi 5 mln tonnany qurap, 2021 jylmen salystyrǵanda 3,1 paıyzǵa artty.

Qyrkúıekte benzın baǵasy byltyrǵymen salystyrǵanda 13,4 paıyzǵa ósti. Onyń ishinde AI-98 - 11,7, AI-92 - 12,8, AI-95/AI-96 16,8 paıyzǵa qymbattady. AI-92 markaly benzınniń bir lıtriniń ortasha baǵasy — 203 teńge, AI-95/AI-96 — 249 teńge, AI-98 — 261 teńge.

Óńirler boıynsha Almatydaǵy benzın baǵasy eń kóp qymbattady: byltyrǵy qyrkúıekpen salystyrǵanda 15 paıyzǵa. Odan keıin Almaty oblysy jáne Qaraǵandy oblysy: tıisinshe 14,4 jáne 14,3 paıyz.

Bıyl 13 qazandaǵy jaǵdaı boıynsha, álemdegi eń arzan benzın Mysyrda tirkeldi: lıtrine AQSh 0,32 dollary (153,24 teńge). Odan keıingi orynda Aljır (0,32 dollar) jáne Kýveıt (0,34 dollar/ 162,81 teńge) tur.

Qazaqstanda benzın lıtri 0,46 dollar/ 220,28 teńgeni qurap, besinshi orynǵa turaqtady.

TMD elderi arasynda da eń arzan benzın Qazaqstanda.

Reseı álem boıynsha benzın arzandyǵy jóninen jetinshi orynda tur: 0,53 dollar/253,80 teńge.

Ázerbaıjanda bir lıtr benzın 0,62 dollar/ 296,90 teńge, Belarýste — 0,75 dollar/359,15 teńge, Ózbekstanda — 0,89 dollar/426,19 teńge, Armenııada — 1,2 dollar/574,64 teńge, Ýkraınada — 1,44 dollar/689,57 teńge.

Eń qymbat benzın Gonkongta (2,88 AQSh dollary/1379,14 teńge), Fınlıandııada (2,23 AQSh dollary/1067,87 teńge) jáne Grekııada (2,14 AQSh dollary/1024,77 teńge) tirkelgen.